काठमाडौं । नागरिक लगानीकोषको असार ९ गते शनिवार अपरान्ह २ बजे बसेको सञ्चालक समितिले यहि असार ३१ गते वार्षिक साधारणसभा आह्वान गर्ने निर्णय गरेको छ । कोषले आर्थिक वर्ष २०७८/७९ को २८ औ वार्षिक साधारणसभा केन्द्रिय कार्यालय नयाँ बानेश्वरमा गर्ने भएको छ ।
कोषको बैशाख २९ गते बसेको सञ्चालक समितिले चुक्ता पूँजीको २५ प्रतिशत बोनस शेयर वितरण गर्ने प्रस्ताव गरेको छ । साधारणसभामा सञ्चालक समितिको लाभांश वितरण गर्ने प्रस्ताव गरिएको छ । साधारणसभा प्रयोजनका लागि असार १९ गते एक दिन बुक क्लोज गर्ने निर्णय गरिएको छ । कोषले प्रस्ताव गरेको २५ प्रतिशत लाभांश असार १८ गतेसम्म कायम शेयरधनीहरुले प्राप्त गर्ने छन् ।
सभाले सञ्चालक समितिको तर्फबाट अध्यक्षले पेस गर्ने कोषको आर्थिक वर्ष २०७८/७९ को वार्षिक प्रतिवेदन उपर छलफल गरि पारित गर्नेछ । त्यस्तै लेखापरीक्षको प्रतिवेदन सहितको २०७९ साल असार मसान्तको वासलात नाफा नोक्सान हिसाब र नगद प्रवाह विवरण उपर छलफल गरि पारित गर्ने एजेण्डा रहेको छ ।
कोषको आर्थिक वर्ष २०७८/७९ को आम्दानी बाँडफाँट हिसाब विवरणमा छुट्याइएको प्रस्तावित २५ प्रतिशत बोनस शेयर र १.३१५८ प्रतिशत कर प्रयोजनका लागि नगद लाभांश स्वीकृतिका लागि सभामा पेश गरिने भएकव छ । कोषको सञ्चालक समितिमा अन्य बैंक तथा वित्तीय संस्थाहरु मध्येबाट त्यस्ता संस्थाले तोके बमोजिम निर्वाचित वा मनोनीत गरेका मध्येबाट एक जनाको निर्वाचन गरिने भएको छ । साधारण सभाको निर्णय पुस्तिकामा हस्ताक्षर गर्न शेयरधनीहरु तथा सञ्चालकहरुको तर्फबाट एक/एक जना प्रतिनिधि नियुक्त गरिने भएको छ ।
