काठमाडौं । तरलता निरन्तर वृद्धि हुँदै छ । जेठ २३ गते बैंकहरुमा ३ अर्बले निक्षेप बढेको छ । जेठ २२ गते ५५ खर्ब ३० अर्ब रहेको निक्षेप जेठ २३ गते ५५ खर्ब ३३ अर्ब पुगेको छ । जेठ २२ गते पनि बैंकहरुमा एकै दिन ५ अर्बले निक्षेप वृद्धि भएको थियो । दुई दिनमा ८ अर्बले निक्षेप बढेको नेपाल राष्ट्र बैंकको तथ्यांकले देखाउँछ ।
कर्जाको माग कम हुँदा र आर्थिक क्रियाकलापमा केही सुस्तता आउँदा तरलता बढ्दो क्रममा छ । फलस्वरूप ब्याज दर निरन्तर घट्ने क्रममा रहेको छ । अन्तर बैंक ब्याज दर पनि ७ प्रतिशतभन्दा तल आएको छ । जेठ २३ गते अन्तर बैंक ब्याज दर ६ दशमलव ६७ प्रतिशत छ ।
सिडी रेसियो पनि सहज हुँदै छ । सिडी रेसियो ८४ दशमलव ४६ प्रतिशत रहेको छ। यो प्रतिशतले कर्जा दिन राम्रै तरलता रहेको देखाउँछ । तर अहिले बैंकहरु पूँजीकोषका कारण कर्जा दिन केही दबाबमा रहेका छन् ।
