काठमाडौं । इन्स्योरेन्स इन्स्टिच्युट नेपालले बीमा प्रतिष्ठानको रुपमा काम गर्ने भएको छ । बीमा नियमावलीको मस्यौदाको दफा ९८ मा बीमा प्रतिष्ठानको व्यवस्था गरिएको छ । यो नियमावली प्रारम्भ हुँदाका बखत प्रचलित कम्पनी कानुन बमोजिम स्थापना भएको इन्स्योरेन्स इन्स्टिच्युट नेपाल लिमिटेडले बीमा प्रतिष्ठानको रुपमा काम गर्नेछ ।
प्रतिष्ठानले बीमा सम्बन्धी जनशक्तिको क्षमता अभिबृद्धि, बीमा सम्बन्धी कलेज सञ्चालन, बीमा सम्बन्धी अध्ययन अनुसन्धान तथा कार्यक्रम गर्नेछ ।
इन्स्टिच्युटमा बीमा प्राधिकरण सहित २० निर्जीवन, १९ जीवन र एक निर्जीवन बीमा कम्पनीको शेयर लगानी रहेको छ । कम्पनीहरु मर्जरमा गएका कारण लगानी गर्ने बीमा कम्पनीको संख्या भने घटेको छ ।
इन्स्टिच्युटले बीमा कम्पनी तथा बैंक वित्तीय संस्थाका कर्मचारीहरुलाई तालिम प्रदान गर्दै आइरहेको छ । सर्भेयरको लाइसेन्स प्रदान गर्नु अगाडी प्रारम्भिक रुपमा लिनु पर्ने तालिम पनि यहिबाट सञ्चालन गरिएको थियो ।
