काठमाडौं । शेयर लगानीकर्ताहरुले शेयर कारोबार ठप्प पारेका छन् । उनिहरुले सम्पुर्ण ब्रोकर कार्यालयमा तालबन्दी गर्दा कारोबार नै ठप्प भएको छ । लगानीकर्ताहरुले ब्रोकर कार्यालय खोल्ने प्रयास भएमा सम्बन्धित पक्षबाट हुने हानी बेहर्न समेत चेतावनी दिइएको छ ।
उनिहरुको चेतावनी सँगै लगभग कारोबार ठप्प छ । तर अनलाइन प्रणालीबाट शेयर खरिद बिक्री हुने भएकाले थोरै थोरै शेयर खरिद बिक्री भने भइरहेको छ ।
लगानीकर्ताहरुले आर्थिक विधेयकमा भएको व्यवस्था हटाउने माग गर्दै अर्थमन्त्री डा. प्रकाशशरण महत सँग अर्थमन्त्रालयमा बैठक बसिरहेका छन् । उनिहरुले पूँजीगत लाभकर ५ प्रतिशत र साढे ७ प्रतिशत अन्तिम कर हुनु पर्ने भन्दै माग राखेका छन् ।
राजश्व विभागले स्पष्टिकरण दिएको पटके र व्यवसायिक लगानीकर्ता भनेर गरेको वर्गिकरणले अन्योल पैदा गरेको भन्दै आर्थिक विधेयकको सम्बन्धित दफा नै खारेज गरिदिनु पर्ने अडान राखेका छन् । यसै क्रममा उनिहरुले आज अर्थमन्त्री महतको घर घेराउ गर्न पुगेका थिए । तर प्रहरीले अवरोध गरे पछि उनिहरुले मन्त्रालयमै छलफल गर्ने निर्णय गरेका हुन् ।
