काठमाडौं । सस्तो मूल्यमा ब्लुचिप कम्पनीको शेयर खरिद गर्ने होडवाजीले नेप्से सूचक र कारोबार रकम दुबैमा सुधार देखिएको छ । मंगलबार ५१ अंकले बढेको शेयर बजार आज भने १२ अंकले बढेको छ । बैंकिङ प्रणालीमा तरलता बढेको र असार पछि कर्जाको व्याजदर कोभिड १९ कै हाराहारीमा झर्ने विश्लेषण सँगै लगानीकर्ता हौसिएका हुन् ।
बैंकरहरुले आगामी असारदेखि देखिने गरी कर्जाको व्याजदर घट्ने घोषणा गरिसकेका छन् । नयाँ कर्जा प्रवाह नहुँदा बैंकिङ प्रणालीमा तरलता थुप्रिने क्रम बढेको छ । प्रयाप्त तरलता सँगै बैंकहरुले शेयरधितोकर्जा प्रवाह गर्न थालिसकेका छन् ।
नयाँ ब्रोकर लाइसेन्स जारी गरेको भन्दै पुराना ब्रोकरहरुले जवरजस्ती बजार घटाउन खोजिरहेका थिए । तर नेपाल धितोपत्र बोर्डले नयाँ ब्रोकरलाई लाइसेन्स दिन थालिसकेको छ । ७ वटाले व्यवसाय शुभारम्भकै लागि लाइसेन्स पाइसकेका छन् । अव बजारमा नयाँ प्लेयर भित्रिने छन् । नयाँ ब्रोकरले दोस्रो बजारलाई पनि विस्तार गर्ने आकलन सँगै शेयर बजारमा सुधार देखिन थालेको हो ।
नयाँ पुराना गरेर ९० वटा भन्दा धेरै ब्रोकर कार्यालयहरु सञ्चालनमा आउने छन् । नयाँ ब्रोकरले बजारको खोजि गर्दै काठमाडौं बाहिर जानु पर्नेछ । यसले पनि शेयर बजारको विस्तारमा मद्दत पुग्ने लगानीकर्ताहरु बताउछन् ।
बुधबार नेप्से सूचक १६.४९ अंकले बढेको छ । सूचक सँगै कारोबार रकम पनि एक अर्ब ८७ करोड रुपैयाँको भएको छ । कारोबार रकममा विस्तारै बढ्ने क्रम जारी छ । जवकी एक साता अगाडी दोस्रो बजारमा ६०/७० करोडको हाराहारीमा मात्रै कारोबार हुन्थ्यो ।
नेप्से सूचक १९५९.१२ अंकमा रोकिएको छ । १३१ वटा कम्पनीको शेयर मूल्यमा सुधार हुँदा ८३ वटा कम्पनीको शेयर मूल्य भने घटेको छ । आत्मनिर्भर र युनिलिभरको शेयर मूल्य सर्वाधिक बढ्ने क्रममा सर्किट लागेको छ । शिवम सिमेन्टको मात्रै १४ करोड ६४ लाख रुपैयाँको खरिद बिक्री भएको छ । नेशनल लाइफ हिमालयन डिष्ट्रिलरीको सर्वाधिक कारोबार भएको छ । लगानीकर्ताले बजार मूल्य बढ्न सक्ने कम्पनीहरु छानी छानी खरिद गरिरहेका छन् ।
