काठमाडौं । हिमालयन लाइफ इन्स्योरेन्स कम्पनीले मनोजलाल कर्णलाई प्रमुख कार्यकारी अधिकृतमा नियुक्ति गर्नका लागि बीमा प्राधिकरणमा स्वीकृतिका लागि पेश गरेको छ । प्राधिकरणमा कर्णको फाइल स्कृतिका लागि पेश भएको छ ।
कम्पनीले कर्णको मासिक तलब १५ लाख रुपैयाँ प्रस्ताव गरेको छ । साविक यूनियन लाइफमा हुँदा उनको वार्षिक तलब सुविधा ८२ लाख रुपैयाँ भन्दा माथि थियो । अहिले उनको तलब सुविधा दोब्बर भन्दा धेरैले बढाइएको छ ।
साविक यूनियन, प्राइम र गुराँस लाइफ मर्जर भएर बैशाख २६ गतेदखि एकिकृत कारोबारको शुभारम्भ गरेका थिए । तीन कम्पनी एक भए सँगै प्रमुख कार्यकारी अधिकृतको तलब पनि तीन गुणाले बढाउन खोजिएको हो ।
कम्पनीले तलब सुविधा सहित नियुक्तिका लागि दिएको आवेदन प्राधिकरणले अध्ययन गरिरहेको छ । स्वीकृति हुँदा उनको तलब सुविधा घट्न पनि सक्नेछ । प्राधिकरणले उनको तलब आधा घटाउन सक्ने एक अधिकारीले जानकारी दिए ।
मर्जर पछि कम्पनीको प्रमुख कार्यकारी अधिकृतले अनुमति नपाउदा आधिकारिक रुपमा काम कारबाही गर्न पाइरहेका छैनन् । संयुक्त मर्जर कमिटीले कर्णलाई नियुक्ति गरे सके पछि नियामक बीमा प्राधिकरणबाट पनि स्वीकृति लिनु पर्ने भएकाले कर्णले हिमालयन लाइफमा आधिकारिक रुपमा कार्यकाल सुरु गर्न नपाएका हुन् ।
