काठमाडौं । प्रभु लाइफ इन्स्योरेन्ससँग मर्जर प्रक्रियामा रहेको महालक्ष्मी लाइफले चालु आर्थिक वर्षको तेश्रो त्रैमासको वित्तीय विवरण सार्वजनिक गरेको छ । सार्वजनिक गरिएको वित्तीय विवरण अनुसार ९ महिनामा कम्पनीले १ अर्ब १६ करोड खुद बीमा शुल्क आर्जन गर्न सफल भएको छ । गत आर्थिक वर्षको तेश्रो त्रैमाससम्म कम्पनीले १ अर्ब ११ करोड खुद बीमा शुल्क आर्जन गरेको थियो । एक वर्षको अवधिमा खुद बीमा शुल्क आर्जन ४ दशमलव २२ प्रतिशतले बढेको छ ।
तेश्रो त्रैमाससम्म कम्पनीले ८ करोड ३२ लाख खुद नाफा गरेको छ । गत आर्थिक वर्षको चैत मसान्तसम्म यो नाफा ७ करोड २४ लाख थियो । नाफा १४ दशमलव ९४ प्रतिशतले वृद्धि भएको छ ।
२ अर्ब १० करोड चुक्ता पुँजी भएको कम्पनीको जगेडामा २७ करोड ४० लाख रहेको छ । एक वर्षको अवधिमा जगेडा रकम २४ दशमलव ४३ प्रतिशतले वृद्धि भएको छ । जीवन बीमा कोष ५५ दशमलव ७७ प्रतिशतले वृद्धि हुँदै ३ अर्ब ८ करोड पुगेको छ । एक वर्ष अघि जीवन बीमा कोषमा १ अर्ब ९८ करोड थियो ।
कम्पनीको खुद दावी भुक्तानी ४६ दशमलव ९२ प्रतिशतले वृद्धि हुँदै १८ करोड ३८ लाख पुगेको छ ।
