काठमाडौं । नेपाल धितोपत्र बोर्डले ब्रोकर लाइसेन्सका लागि प्रारम्भिक अनुमतिपत्र दिए सँगै दोस्रो बजारमा सुधारको संकेत देखिएको छ । बोर्डले सोमबार १६ वटा र आज १३ वटालाई लाइसेन्स दिए सँगै बजारमा २९ वटा नयाँ ब्रोकर आउने भएका छन् ।
नयाँ ब्रोकर आए सँगै बजारको दायरा थप फराकिलो हुने विश्लेषण गरिएको छ । प्रारम्भिक चरणमा पुरान ब्रोकरले बजार घटाउन खोजे पनि नयाँ ब्रोकरले व्यवसाय शुभारम्भ गर्न थाले पछि बजारले पनि गति लिने विश्लेषण गरिएको छ ।
आज साताको अन्तिम कारोबारका दिन १२.७३ अंकले सुधार भएको छ । सूचकमा सुधार भए सँगै १८६९.७३ अंकमा रोकिएको छ । कारोबार रकम ७३ करोड २६ लाख रुपैयाँमा सिमित भएको छ । ५० वटा कम्पनीको शेयर मूल्य घटेको छ भने १६२ वटा कम्पनीको शेयर मूल्यमा सुधार देखिएको छ ।
आज सम्पुर्ण सूचक तथा उपसूचकमा सुधार देखिएको छ । अझै पनि बजारमा लगानीकर्ताको विश्वास फर्किन सकेको छैन । समग्र आर्थिक अवस्थालाई लिएर लगानीकर्ताहरु चिन्तित छन् । विकास खर्च हुन सकेको छैन । व्यापार घाटा चुलिदैछ । व्यवसायीहरु ऋणको व्याज र किस्ता तिर्न सकिरहेका छैनन् । व्यवसायीहरुले आत्महत्या गरेका घटना एक पछि अर्को गर्दै बाहिर आइरहेका छन् । बजारमा तरल पैसा नआएसम्म बजारले गति लिन सक्ने देखिदैन ।
