काठमाडौं । सिटिजन लाइफ इन्स्योरेन्स कम्पनीको मुनाफा लेखापरीक्षण पश्चात दोब्बरले बढेको छ । कम्पनीले गत आर्थिक वर्ष २०७८/७९ को चौथौ त्रैमाशिक अवधिको अपरिष्कृत वित्तीय विवरण अनुसार १८ करोड ८२ लाख रुपैयाँ मुनाफा आर्जन गरेको थियो ।
लेखापरीक्षण पश्चात यहि अवधिमा कम्पनीको मुनाफा ३७ करोड ६० लाख रुपैयाँ कायम भएको छ । यस भन्दा अघिल्लो आर्थिक वर्षमा कम्पनीले ३० करोड ५ लाख रुपैयाँ मुनाफा आर्जन गरेको थियो । मुनाफा बढे सँगै प्रतिशेयर आम्दानी १७ रुपैयाँबाट २१ रुपैयाँ कायम भएको छ ।
कम्पनीले गएको वर्षमा ५ अर्ब ३१ करोड रुपैयाँ बीमा शुल्क आर्जन गरेको थियो । यहि अवधिमा एक अर्ब २८ करोड रुपैयाँ दाबी भुक्तानी गरेको थियो । यस मध्ये ११ करोड ७१ लाख रुपैयाँ पुनर्बीमा कम्पनीबाट प्राप्त गरेको छ । पुनर्बीमा कम्पनीलाई व्यवसाय दिए बापत २ करोड ९० लाख रुपैयाँ कमिशन प्राप्त गरेको छ ।
कम्पनीले पुनर्बीमा कम्पनीलाई जोखिम हस्तान्तरण गरे बापत २८ करोड ६७ लाख रुपैयाँ प्रिमियम भुक्तानी गरेको छ । जीवन बीमा व्यवसाय भित्र्याउने अभिकर्ताहरुलाई ७७ करोड ३९ लाख रुपैयाँ कमिशन दिएको छ । कर्मचारी खर्च मात्रै २२ करोड ७८ लाख रुपैयाँ रहेको छ । अन्य खर्च ५४ करोड ७३ लाख रुपैयाँ रहेको छ । लगानी आम्दानी ७३ करोड ३८ लाख रुपैयाँ रहेको छ ।
