काठमाडौं । नेपाल राष्ट्र बैंकका गभर्नर महाप्रसाद अधिकारीले एक वर्षमा ४९ लाख ५ हजार २५५ रुपैयाँ बराबरको तलब, भत्ता तथा सुविधा बुझेका छन् । गभर्नर अधिकारीले गत आर्थिक वर्ष २०७८/७९ मा तलब बापत १४ लाख १८ हजार ४०० रुपैयाँ प्राप्त गरेका छन् ।
त्यस्तै सञ्चालक समितिको बैठक भत्ता बापत तीन लाख ५ हजार रुपैयाँ र अन्य अलाउन्सेस तथा सुविधा बापत ३१ लाख ८१ हजार ८५५ रुपैयाँ प्राप्त गरेका छन् । बैंक तथा वित्तीय संस्थाहरुलाई नियमन गर्ने निकाय नेपाल राष्ट्र बैंकका गभर्नरको तलब सुविधा सरकारी सेवा सुविधा पाउनेहरु मध्ये आकर्षक मानिन्छ ।
तर नेपाल राष्ट्र बैंकले नियमन गर्ने बैंक वित्तीय संस्थाका प्रमुख कार्यकारी अधिकृतहरुले भने करोडौं रुपैयाँ तलब सुविधा बुझ्ने गरेका छन् । बैंक वित्तीय संस्थाहरु मध्ये प्रभु बैंकका प्रमुख कार्यकारी अधिकृत अशोक शेरचनले गत आर्थिक वर्षमा चार करोड तीन लाख रुपैयाँ बुझेका थिए ।
त्यस्तै डेपुटी गभर्नर निलम ढुङ्गाना तिमल्सिनाले भने गत आर्थिक वर्षमा तलब बापत १२ लाख ६९ हजार, बैठक भत्ता दुई लाख ७३ हजार र अन्य सेवा सुविधा बापत २७ लाख १७ हजार सहित कुल ४२ लाख ४९ हजार रुपैयाँ बुझेकी छिन् । त्यस्तै अर्का डेपुटी गभर्नर बम बहादुर मिश्रले १२ लाख ६९ हजार तलब, २ लाख ९६ हजार भत्ता र अन्य सुविधा सुविधा बापत २६ लाख ३६ हजार सहित कुल ४२ लाख रुपैयाँ प्राप्त गरेका छन् ।
