काठमाडौं । साताको अन्तिम दिन आज बीहिबार शेयर बजार ८.२८ अंकले घटेको छ । बुधबार बजार सुधार देखिए पनि आज भने निरन्तरता पाउन नसक्दा १८६६.७९ अंकमा रोकिएको छ । कारोबार रकम ९२ करोड ६ लाख रुपैयाँमा सिमित भएको छ ।
आगामी बैशाख महिनामा पनि बजार सुधार हुन नसक्ने विश्लेषण पछि लगानीकर्ता हच्किएका छन् । लगानीकर्ताले पैसाको स्रोत शेयर बजारलाई मात्रै बनाउदा बजार लगातार घटिरहेको छ । घरजग्गा लगायत अन्य क्षेत्रमा पुरै मन्दी छ । आर्थिक गतिविधि लगभग ठप्प छ । लगानीकर्ताले लिक्वीट सम्पत्तीको रुपमा र सजिलै बिक्री गर्न सकिने सम्पत्तीको रुपमा शेयर बजारलाई प्रयोग गर्दा बजार घटिरहेको छ ।
आज १६५ वटा कम्पनीको शेयर मूल्यमा गिरावट देखिएको छ भने ४८ वटा कम्पनीको शेयर मूल्यमा सुधार भएको छ । बैंकिङ, निर्जीवन र व्यापारको सूचक बाहेक अन्य सूचकमा गिरावट देखिएको छ । लगानीकर्ताले सस्तिएको बैंकको शेयर उठाउन खोज्दा केहि थोरैले मात्रै सुधार भएको छ ।
ठुला लगानीकर्ताको रोजाइमा पर्दै आएका शिवम, नेपाल पुनर्बीमा, नविल, हिमालयन डिष्ट्रिलरीको सर्वाधिक कारोबार भएको छ । यिनै कम्पनीको शेयर बिक्री गरेर ठुला लगानीकर्ताले पैसा जोहो गरिरहेका छन् । आज पनि कालिन्चोक दर्शनको शेयर मूल्य सर्वाधिक सुधार हुने क्रममा सर्किट लागेको छ ।
