काठमाडौं । शेयर बजार लगानीकर्ताको व्याज र किस्ता जोहो गर्ने एक मात्रै विकल्प बन्दा लगातार घटिरहेको छ । लगानीकर्ताहरु तेस्रो त्रैमाशिक अवधिको व्याज र किस्ताका लागि दाववमा छन् । घरजग्गाको कारोबार ठप्प छ । पैसा उठाउने उपयुक्त विकल्प अहिलेको अवस्थामा अरु केहि पनि छैन । यसले गर्दा आफु सँग भएको शेयर बिक्री गरेर सजिलै पैसा प्राप्त गर्ने मात्रै शेयर बजार रहेको छ ।
बजार अझै घट्ने आकलन गर्दै उनिहरुले तत्कालका लागि शेयर बिक्री गर्ने रणनीति बनाएका हुन् । उनिहरुको यहि रणनीतिले दोस्रो बजारमा शेयर सप्लाइ लगातार बढिरहेको छ । शेयर सप्लाइ बढ्ने वित्तीकै पहिलो प्रभाव बजार मूल्यमा पर्छ । त्यसैले गर्दा आज मंगलबार पनि ५.२० अंकले घटेको छ ।
सरकारमा नेपाली कांग्रेसका अर्थमन्त्री डा. प्रकाशशरण महत छन् । नेपाली कांग्रेसबाट अर्थमन्त्री हुँदा समेत बजारले सकारात्मक प्रतिक्रिया नदिदा लगानीकर्ताहरु चकित परेका छन् । अहिले बजार घट्नुको प्रमुख कारण लगानीकर्ताहरु सँग तरलता नै नभए हो ।
अर्थमन्त्रीले जस्तो सुकै पहल कदम अगाडी बढाउदा पनि समाधानका कुनै उपाय बजारमा छैन । अहिलेको आर्थिक संकट अझै कति लामो समय रहन्छ भन्ने अनुमान लगाउन सकिएको छैन । यसले गर्दा पनि लगानीकर्ताहरु डराएका हुन् ।
अर्थतन्त्रका विभिन्न सूचक नकारात्मक देखिन्छन्, बजारमा सकारात्मक कुराकानी नै हुँदैन, प्रणालीमै समस्या देखिन थालेकाले यसको प्रभाव दीर्घकालिन पर्ने विश्लेषण आदिले पनि लगानीकर्ताहरु आत्तीएका हुन् । लगानीकर्ता डराउदा शेयर बजार साढे दुई वर्ष पछाडी फर्किएको छ । नेप्से सूचक २०७७ मंसिरमा १८८१ अंकको विन्दुलाई उछिनेर अगाडी बढेको थियो ।
मंगलबार नेप्से सूचक १८६६.६८ अंकमा रोकिएको छ । यो सूचक विगत तीन वर्षयताकै सर्वाधिक कम हो । सूचक सँगै कारोबार रकम पनि ९१ करोड ७६ लाख रुपैयाँमा सिमित भएको छ । ११६ वटा कम्पनीको शेयर मूल्यमा गिरावट आउदा ८६ वटा कम्पनीको शेयर मूल्यमा गिरावट देखिन्छ ।
कालिञ्चोक दर्शनको शेयर मूल्यमा सर्वाधिक सुधार हुँदा सकारात्मक सर्किट लागेको छ । सबैभन्दा धेरै शिवम सिमेन्टको तीन करोड ३६ लाख रुपैयाँको खरिद बिक्री भएको छ ।
