काठमाडौं । बैंक तथा वित्तीय सस्थाहरुमा एकै दिन १० अर्बले निक्षेप वृद्धि भएको छ । नेपाल राष्ट्र बैंकले प्रकाशन गरेको तथ्यांक अनुसार वाणिज्य बैंकमा एकै दिनमा १० अर्बले निक्षेप वृद्धि हुँदा समस्त बैंकिङ प्रणालीमा १० अर्बले निक्षेप वृद्धि भएको हो । चैत १६ गते बैंकिङ प्रणालीमा ५४ खर्ब १५ अर्ब निक्षेप रहेकोमा अर्को दिन अर्थात् चैत १७ गते निक्षेप बढेर ५४ खर्ब २५ अर्ब पुगेको छ । कुल निक्षेपमा वाणिज्य बैंकले संकलन गरेको निक्षेप ४७ खर्ब ८५ अर्ब रहेको छ ।
त्यस्तै कर्जा प्रवाह पनि सामान्य वृद्धि भएको छ। एक दिनको अवधिमा कर्जा प्रवाह २ अर्बले वृद्धि हुँदै ४८ खर्ब २० अर्ब पुगेको छ जसमा वाणिज्य बैंकहरुले प्रवाह गरेको कर्जा ४२ खर्ब ७६ अर्ब रहेको छ ।
कर्जा वृद्धिको तुलनामा निक्षेप धेरैले वृद्धि हुँदा सिडी रेसियो ८५ दशमलव ५४ प्रतिशतमा झरेको छ । अघिल्लो दिन सिडी रेसियो ८५ दशमलव ६६ प्रतिशत थियो । केही समय देखि बैंकले कर्जा प्रवाह कम गर्दा र निक्षेप निरन्तर वृद्धि हुँदा सिडी रेसियो सहज हुँदै आएको छ। सिडी रेसियो कम हुनुले बैंकमा तरलता बढ्दै गएको संकेत गर्छ । तरलता वृद्धि हुँदा बैंकलाई ब्याज घटाउन सहयोग पुग्छ ।
