काठमाडौं । साताको अन्तिम दिन शेयर बजारमा १०.८७ अंकको गिरावट देखिएको छ । लगानीकर्ताले व्याज, कित्ता र करको जोहो गर्न खोज्दा बजार लगातार घटिरहेको छ । मंगलबार/बुधबारदेखिनै बजार सुधार हुने विश्लेषण गरिरहदा लगानीकर्ताले व्याज किस्ता र कर जोहो गर्न खोज्दा आज थप सप्लाइ बढेको छ । सप्लाइ बढ्दा समग्र बजारमै गिरावट देखिएको हो ।
चैत अन्तिम सातादेखि सुधार हुने भन्दै केहि लगानीकर्ताले शेयर उठाउन थालिसकेका छन् । उनिहरुले शेयर उठाउन खोजे पनि ठुला लगानीकर्ताले सप्लाइ बढाउदा बजार माथि जान सकेको छैन । कतिपय लगानीकर्ताहरु अझै पर्ख र हेरको अवस्थामा छन् भने कितपय लगानीकर्ताले थोरै थोरै गरेर शेयर खरिद गर्न सुरु गरिसकेका छन् ।
बिहीबार नेप्से सूचक १०.८७ अंकले घटेर १९०८.५५ अंकमा झरेको छ । ४९ वटा कम्पनीको शेयर मूल्यमा सुधार हुँदा १५७ वटा कम्पनीको शेयर मूल्यमा भने गिरावट आएको छ । होटल र म्युचुअल फण्डको सूचकमा सुधार देखिए पनि बाँकी सूचकमा गिरावट आएको छ । कारोबार रकम ८९ करोडमै सिमित भएको छ ।
