काठमाडौं । मेट लाइफ नेपालले माउ कम्पनी ‘अमेरिकन जीवन बीमा कम्पनी एलिको’लाई गत आर्थिक वर्षको मुनाफाबाट ३२ करोड ११ लाख २९ हजार ९०० रुपैयाँ मुनाफा दिने निर्णय गरेको छ । कम्पनीले मुनाफा वितरणका लागि नेपाल बीमा प्राधिकरणबाट स्वीकृति समेत प्राप्त गरिसकेको छ ।
कम्पनीले पछिल्लो अमेरिकी विनिमय दर अनुसार २.४३ मिलियन डलर मुनाफा दिने भएको हो । कम्पनीले गत आर्थिक वर्षमा ५९ करोड ६५ लाख रुपैयाँ मुनाफा आर्जन गरेको थियो ।
कम्पनीले अघिल्लो आर्थिक वर्षकै मुनाफा लैजान पाएको छैन । अघिल्लो आर्थिक वर्ष २०७७/७८ को मुनाफाबाट कम्पनीले २६ करोड ५० लाख रुपैयाँ लाभांश दिने स्वीकृति पाएको थियो । नेपाल बीमा प्राधिकरणबाट स्वीकृति पाए पनि नेपाल राष्ट्र बैंकले अन्तिम स्वीकृति प्रदान नगरेकाले पैसा लैजान पाएको छैन । पछिल्लो विनिमयदर अनुसार कम्पनीले २ मिलियन डलर पठाउनु पर्नेछ । यसरी प्राधिकरणबाट स्वीकृति पाइएको दुई वर्षको लाभांशबाटै कम्पनीले ४.४३ मिलियन डलर पठाउनु पर्नेछ ।
कम्पनीले गत आर्थिक वर्षको मुनाफाबाट १० प्रतिशत अर्थात ५ करोड ९६ लाख रुपैयाँ प्राकृतिक विपद कोषमा जम्मा गरेको छ । त्यस्तै सामाजिक उत्तरदायित्व अन्तर्गत मुनाफाको एक प्रतिशत अर्थात ५९ लाख ६५ हजार रुपैयाँ छुट्टाएको छ । कर्मचारी वृत्ती विकासका लागि ९९ लाख ८६ हजार रुपैयाँ छुट्टाएको छ ।
