काठमाडौं । एनएमबि बैंक लिमिटेडले ६७ हजार ६०७ कित्ता संस्थापकतर्फको शेयर सर्वसाधारणमा विक्री खुला गरेको छ। बैंकले चैत १६ गतेदेखि २३ गतेसम्म व्यक्तिगत संस्थापकहरूको नाममा रहेको उक्त शेयर विक्रीमा ल्याउन लागेको हो ।
शेयरको मूल्य प्रतिकित्ता १८० रुपैयाँ तोकिएको छ । तोकिएको मूल्य वा सोभन्दा बढी मूल्य अंकित गरी इच्छुक विद्यमान संस्थापक शेयरधनी लगायत अन्य व्यक्ति तथा संस्थाहरूले तोकिएको अवधिभित्र गोप्य शिलबन्दी बोलपत्र पेस गर्नुपर्नेछ । बोलपत्र विक्री प्रबन्धक एनएमबि क्यापिटल लिमिटेडको कार्यालय, नागपोखरी, काठमाडौंमा पेस गर्नुपर्ने बैंकले जनाएको छ ।
बोलपत्र पेश गर्दा न्यूनतम ५ हजार कित्तादेखि अधिकतम सम्पूर्ण कित्तासम्म माग गर्न सकिने व्यवस्था छ । तोकिएको अवधिभित्र प्राप्त बोलपत्र चैत २४ गते एनएमबि क्यापिटलको कार्यालयमा बिहान १० बजे खोलिने कार्यक्रम समेत तय गरेको छ ।
