काठमाडौं । आज सोमवार नेपाल स्टक एक्सचेन्जमा दुई हाइड्रोपावर कम्पनीको आइपीओ सूचिकृत भएको छ । नेप्सेमा सुपरमाई हाइड्रोपावर लिमिटेडको कुल ५० लाख कित्ता र माया खोला हाईड्रोपावरको १ करोड कित्ता साधारण शेयर सूचिकृत भएको हो । दुवै कम्पनीको शेयर धितोपत्रको दोस्रो बजारमा मंगलवारदेखि कारोबारमा आउनेछ ।
माया खोला हाइड्रोपावरले आयोजना प्रभावित क्षेत्रका स्थानीय बासिन्दामा वितरण गरेको १० लाख कित्ता, सर्वसाधारणको लागि निष्काशन गरेको २ लाख ४० हजार कित्ता र कम्पनीका संस्थापक शेयरधनीहरूले लगानी गरेको ६६ लाख कित्ता गरी कुल १ करोड कित्ता साधारण शेयर सूचिकृत गराएको हो । यस कम्पनीले पहिलो कारोबारको लागि नेप्सेले ८८ दशमलव ५३ देखि २६५ दशमलव ५९ ओपन रेञ्ज तोकेको छ ।
यही ओपन रेञ्जको आधारमा कम्पनीको शेयर कारोबारमा आउनेछ । कम्पनीको स्टक सिम्बोल एमकेएचसी रहेको छ । त्यस्तै यस कम्पनीले शेयर सूचीकरणपश्चात् दिनुपर्ने आरटीएस सेवा सिटिजन्स क्यापिटल लिमिटेड डिल्ली बजार, काठमाडौंबाट हुने जनाएको छ ।
त्यसैगरी सुपरमाई हाइड्रोपावर कम्पनीले स्थानीय बासिन्दाका लागि निष्काशन गरेको ५ लाख कित्ता, सर्वसाधारण लगानीकर्ताहरूमा वितरण गरेको ५ लाख कित्ता र कम्पनीका संस्थापक शेयरधनीहरूले लगानी गरेको ४० लाख कित्ता गरी कुल ५० लाख कित्ता साधारण शेयर सूचिकृत गराएको हो । कम्पनीको स्टक सिम्बोल एसएमएच रहेको छ । आरटीएस सेवा सानिमा क्यापिटल लिमिटेड नक्सालबाट हुने कम्पनीले जनाएको छ ।
आइपीओलाई नेप्सेले पहिलो कारोबारका लागि प्रतिकित्ता न्यूनतम १३० रुपैयाँ ७६ पैसादेखि अधिकतम ३९२ रुपैयाँ २८ पैसा सम्मको मूल्य रेञ्ज तोकिदिएको छ । यही मूल्य रेञ्जका आधारमा कम्पनीको शेयर मंगलवारदेखि धितोपत्रको दोस्रो बजारमा आउनेछ ।
