काठमाडौं । नेपाल राष्ट्र बैंकले सार्वजनिक गरेको देशको वर्तमान आर्थिक तथा वित्तीय सूचकमा सुधार देखिदा पनि शेयर बजारमा भने सुधार हुन सकेन । गत विहीबार नेप्से सूचक ५० अंकले सुधार हुँदा आज पनि बढ्ने अनुमान गरिएको थियो । तर लगानीकर्ताको अनुमान अनुरुप बजारमा सुधार भन्दा पनि ३० अंकले घट्यो ।
राष्ट्रपतिको निर्वाचन लगत्तै मन्त्रिपरिषद विस्तार हुने र बजार बढ्न सुरु गर्ने आकलन गरिएको थियो । तर ८ दलिय गठबन्धनले उपराष्ट्रपतिको निर्वाचन पछि मात्रै मन्त्रिपरिषद विस्तार गर्ने निर्णय गरे पछि आज बजार सुधार हुन सकेन ।
राष्ट्र बैंकले सार्वजनिक गरेको वित्तीय सूचकमा मुद्रास्फिति बाहेर सम्पुर्ण सूचक सकारात्मक देखिएका छन् । वैदेशिक मुद्राको सञ्चितिदेखि लिएर रेमिट्यान्स पनि बढेको छ । तर बजारमा भने यसको भन्दा पनि राजनीतिक घटनाकै प्रभाव धेरै देखियो ।
आज नेप्से सूचक २६.८० अंकले घटेर १९७५.८९ अंकमा रोकिएको छ । कारोबार रकम एक अर्ब ६६ करोड नाघेको छ । जम्मा २६ वटा कम्पनीको शेयर मूल्यमा सुधार देखिदा १८६ वटा कम्पनीको शेयर मूल्यमा गिरावट देखिन्छ ।
शुभम पावरको शेयर मूल्यमा सर्वाधिक बढ्ने क्रममा सर्किटनै लागेको छ । केहि दिनदेखि सबैभन्दा धेरै शिवम सिमेन्टको कारोबार हुँदै आइरहेको छ । कम्पनीको आज ८ करोड २१ लाख रुपैयाँको खरिद बिक्री भएको छ ।
