काठमाडौं । धितोपत्र दलाल व्यवसायी ‘ब्रोकर कार्यालय’ले शाखा कार्यालय खोल्दा प्रति शाखा न्युनतम एक करोड ५० लाख रुपैयाँका दरले चुक्ता पूँजी कायम गर्नु पर्ने भएको छ । नेपाल धितोपत्र बोर्डले ‘धितोपत्र दलाल व्यवसायीले शाखा कार्यालय खोल्ने सम्बन्धी निर्देशिका २०७९’ जारी गर्दै यस्तो व्यवस्था गरेको हो ।
ब्रोकर कार्यालयले शाखा कार्यालय खोल्नु परेमा नेपाल धितोपत्र बोर्डमा निवेदन दिनु पर्नेछ । एउटा ब्रोकर कार्यालयले एक पटकमा एउटा मात्रै शाखा कार्यालय खोल्नका लागि निवेदन दिनु पर्ने भएको छ । धितोपत्र बोर्डले निवेदकलाई आवस्यक कागजपत्र जुटाएको १५ दिन भित्रमा अनुमति दिन सक्ने व्यवस्था गरिएको छ ।
बोर्डले शाखा कार्यालय खोल्न अनुमति दिएको तीन महिना भित्रमा सञ्चालन गरिसक्नु पर्ने निर्देशिकामा उल्लेख छ । काठमाडौं उपत्यका बाहिर तीन वटा शाखा कार्यालय स्थापना गरिसके पछि मात्रै उपत्यका भित्र एउटा शाखा कार्यालय खोल्न पाइने बोर्डले जनाएको छ ।
चुक्ता पूँजी भन्दा बढि नेटवर्थ भएका ब्रोकर कार्यालयले मात्रै शाखा कार्यालय खोल्न पाउने व्यवस्था गरिएको छ । शाखा कार्यालयले गरेका सम्पुर्ण जिम्मेवारी केन्द्रिय कार्यालयले लिनु पर्ने निर्देशिकामा व्यवस्था छ ।
3DFPslPxqsW5d4kb7zfAFjlRhP1R7HRK259vYl5N
