काठमाडौं । शेयर बजार डिप्रेस मुडमा देखिन थालेको छ । दोस्रो बजारको कारोबार रकम र सूचक हेर्दा लगानीकर्तामा उत्साह छैन । शेयर बजारमा लगातारको गिरावट सँगै लगानीकर्ता पर्ख र हेरको अवस्थामा छन् । माघ महिनामा निक्षेप १३ अर्बले बढ्दा कर्जा विस्तार जम्मा ३.३८ अर्ब मात्रै छ । बजारमा कर्जाको माग छैन । अर्को तर्फ तरलता थपिइरहदा पनि बैंकिङ तरलता अझै सुधारको अवस्थामा देखिदैन ।
राजनीतिक संक्रमण र अन्योलता कामयै छ । यसले गर्दा लगानीकर्तामा उत्साह छैन । अर्थतन्त्र कसरी अगाडी बढ्छ भन्ने अन्योलता कायमै छ । राजनीतिक कार्यदिशा निर्यौल नहुँदासम्म शेयर बजारमा सुधार हुने देखिदैन ।
ब्लुचिप भनिएका कम्पनीको शेयर मूल्यमा पनि लगातार गिरावट आइरहेको छ । यसै क्रममा ठुला लगानीकर्ताको लगानी फस्दै जान थालेको छ । अधिक मूल्यका कम्पनीको शेयर मूल्य तल झर्दा साना भन्दा पनि ठुला लगानीकर्ता बढि प्रभावित हुने गर्छन् । यसले गर्दा लगानीकर्ताले अनुमान गरे भन्दा शेयर बजार उल्टो दिशामा अगाडी बढिरहेको छ ।
आज साताको अन्तिम कारोबारकै दिन नेप्से सूचक २१.१५ अंकले घटेको छ । नेप्से सूचक १.०१ प्रतिशतले घटेर २०७०.४१ अंकमा झरेको छ । आज १९७ वटा कम्पनीको शेयर मूल्यमा गिरावट आउदा १५ वटा कम्पनीको शेयर मूल्यमा भने सुधार देखिन्छ । सम्पुर्ण सूचक तथा उपसूचक घटेका छन् । सर्वाधिक धेरै उत्पादन तथा प्रशोधनमुलक सूचकमा १.९३ प्रतिशतले गिरावट आएको छ । सूचकमा गिरावट सँगै कारोबार रकम पनि एक अर्ब ६८ करोड रुपैयाँमा सिमित भएको छ ।
