काठमाडौं । लुम्बिनी जनरल इन्स्योरेन्स कम्पनीको मुनाफामा सामान्य सुधार देखिएको छ । कम्पनीले चालु आर्थिक वर्षको दोस्रो त्रैमाशिक अवधिमा १० करोड ४९ लाख रुपैयाँ मुनाफा आर्जन गरेको छ । गत वर्षको यहि अवधिमा १० करोड ३८ लाख रुपैयाँ आर्जन गरेको थियो ।
कम्पनीले समिक्षा अवधिमा खुद बीमा शुल्क आर्जन ४८ प्रतिशतले बढाएको छ भने कुल बीमा शुल्क आर्जन २८ प्रतिशतले बढाउन सफल भएको छ । यस अवधिम खुद बीमा शुल्क आर्जन ५० करोड ९६ लाख रुपैयाँ रहेको छ भने कुल बीमा शुल्क आर्जन ९७ करोड २१ लाख रुपैयाँ छ ।
गत वर्षको यहि अवधिमा खुद बीमा शुल्क आर्जन ३४ करोड ३७ लाख रुपैयाँ थियो भने कुल बीमा शुल्क आर्जन ७५ करोड ४७ लाख रुपैयाँ थियो । यस अवधिमा दाबी भुक्तानी ३० प्रतिशतले बढेको छ । कम्पनीले २४ करोड ४० लाख रुपैयाँ दाबी भुक्तानी गर्दा पनि अझै ७१ करोड ४४ लाख रुपैयाँ भुक्तानी गर्न बाँकी छ । गत वर्षको यहि अवधिमा एक अर्ब ६ करोड रुपैयाँ दाबी भुक्तानी गर्न बाँकी थियो ।
लुम्बिनीको चुक्ता पूँजी एक अर्ब ३१ करोड रुपैयाँ छ भने जगेडा कोषमा २५ करोड ३७ लाख रुपैयाँ जम्मा भएको छ । बीमा कोषमा ८४ करोड रुपैयाँ जम्मा भइसकेको छ । सगरमाथा इन्स्योरेन्स कम्पनी सँग मर्जरको अन्तिम तयारीमा रहेको लुम्बिनीको प्रतिशेयर आम्दानी १५ रुपैयाँ रहेको छ भने प्रतिशेयर नेटवर्थ १८६ रुपैयाँ छ ।
