काठमाडौं । नेपाल इन्स्योरेन्स कम्पनी, प्रुडेन्सियल र आइएमई जनरलको क्रस होल्डिङ हटाउने नेपाल बीमा प्राधिकरणको प्रयास असफल भएको छ । तीन कम्पनीलाई मर्जर गराउने प्राधिकरणको प्रयास असफल भए पछि अन्तत क्रस होल्डिङ नै नभएका आइएमई जनरल र प्रुडेन्सियल विच मर्जर हुने सहमति भएको हो ।
आइएमई समुहको आइएमई जनरल इन्स्योरेन्स कम्पनी र नेपाल इन्स्योरेन्स कम्पनीमा क्रस होल्डिङ थियो । त्यस्तै मारवाडी समुदायको नेपाल इन्स्योरेन्स र प्रुडेन्सियलमा क्रस होल्डिङ थियो । तर आइएमईको प्रुडेन्सियल र मारवाडी समुदाको आइएमई जनरलमा लगानी छैन । एउटै संस्थापककाे एकै प्रकृतिकाे एकभन्दा बढी बीमा कम्पनीमा १ प्रतिशतभन्दा बढी लगानी भएकाे अवस्था क्रस हाेल्डिङकाे अवस्था हाे ।
प्राधिकरणको प्रयास असफल हुँदै गर्दा मर्जरको नीति क्रस होल्डिङ हटाउने भन्दा पनि संख्या घटाउने मात्रै देखिएको छ । नेपाल इन्स्योरेन्स कम्पनी र अन्य दुई कम्पनी विच स्वाप रेसियोमै कुरा नमिल्दा मर्जर भाडिएको हो । नेपाल इन्स्योरेन्स सँग भौतिक सम्पत्ती धेरै छ । त्यसैले गर्दा यस समुहले स्वाप रेसियो धेरै मागेको थियो ।
तीन वटा कम्पनीलाई मिलाउन खोज्दा अन्तत भोलि नै प्रुडेन्सियल र आइएमई विच मर्जरको सहमति हुँदैछ । दुई कम्पनी विच बराबरी हैसियतमा मर्जर गर्ने सहमति भएको हो । मर्जर पछि कम्पनीको नाम आइएमई जनरल नै रहनेछ । त्यस्तै मर्जर पछि कम्पनीको सञ्चालक समितिको अध्यक्षमा आइएमईका हेमराज ढकाल हुने सहमति भएको छ । प्रमुख कार्यकारी अधिकृतमा भने टुङ्गो लागेको छैन ।
हाल आइएमई जनरलको चुक्ता पूँजी एक अर्ब ८० करोड रुपैयाँ रहेको छ भने प्रुडेन्सियलको एक अर्ब १८ करोड रुपैयाँ छ । प्रुडेन्सियलले प्रस्ताव गरेको बोनस शेयर वितरण पछि चुक्ता पूँजी एक अर्ब २५ करोड पुग्नेछ । बराबरी हैसियतमा मर्जर हुँदै गर्दा मर्जर पछि चुक्ता पूँजी तीन अर्ब ५ करोड पुग्नेछ ।
