काठमाडौं । रिलायबल नेपाल लाइफ इन्स्योरेन्सले चालु आर्थिक वर्ष ७९/८० को दोश्रो त्रैमासको वित्तीय प्रतिवेदन सार्वजनिक गरेको छ । प्रकाशित तथ्यांक अनुसार कम्पनीले गत आर्थिक वर्षको दोश्रो त्रैमासको तुलनामा २१ दशमलव ९० प्रतिशत धेरै खुद नाफा गर्न सफल भएको छ । कम्पनीले अहिले दोश्रो त्रैमाससम्म २२ करोड माथि खुद नाफा गर्दा गत आर्थिक वर्षको दोश्रो त्रैमाससम्म १८ करोड ०५ लाख खुद नाफा गरेको थियो ।
कम्पनीले चालु आर्थिक वर्षको पुष महिनासम्म १ अर्ब ७२ करोड खुद बीमा शुल्क आर्जन गर्न सफल भएको छ ।
२ अर्ब ८० करोड चुक्ता पुँजी भएको कम्पनीको जगेडा कोषमा १ अर्ब २८ करोड संचित छ । जगेडा कोष रकम २८ प्रतिशतले वृद्धि भएको छ । जीवन बीमा कम्पनीको एउटा महत्वपूर्ण सूचक जीवन बीमा कोषको आकार ५५ दशमलव ८१ प्रतिशतले वृद्धि हुँदै ५ अर्ब ६२ करोड पुगेको छ । गत वर्ष पुष मसान्तसम्म जीवन बीमा कोषमा ३ अर्ब ६१ करोड संचित थियो ।
प्रकाशित तथ्यांक अनुसार कम्पनीको वार्षिक प्रति शेयर आम्दानी १५ रुपैयाँ ७२ पैसा र प्रति शेयर नेट्वर्थ १५० रुपैयाँ ६५ पैसा छ ।
कम्पनीले शत प्रतिशत दाबी भुक्तानी गर्न सफल भएको छ । त्यसैले कम्पनीको भुक्तानी हुन् बाँकी दाबी शिर्षकमा कुनै रकम छैन । यसलाई यस क्षेत्रमा निकै सकारात्मक रुपमा लिन सकिन्छ ।
