काठमाडौं । सानिमा लाइफ इन्स्योरेन्सले चालु आर्थिक वर्ष ७९/८० को दोश्रो त्रैमासको वित्तीय प्रतिवेदन सार्वजनिक गरेको छ । प्रकाशित तथ्यांक अनुसार कम्पनीले गत आर्थिक वर्षको दोश्रो त्रैमासको तुलनामा २३ दशमलव ६३ प्रतिशत धेरै खुद नाफा गर्न सफल भएको छ । कम्पनीले अहिले दोश्रो त्रैमाससम्म ११ करोड ६१ लाख खुद नाफा गर्दा गत आर्थिक वर्षको दोश्रो त्रैमाससम्म ९ करोड ३९ लाख खुद नाफा गरेको थियो ।
आम्दानी ११ दशमलव ३८ प्रतिशतले वृद्धि हुँदा व्यवस्था तथा खर्च सिर्षक २० दशमलव ७३ प्रतिशत कम हुँदा कम्पनीको नाफा वृद्धि हुन टेवा पुगेको हो ।
कम्पनीले चालु आर्थिक वर्षको पुष महिनासम्म शून्य दशमलव ८५ प्रतिशत धेरै खुद बीमा शुल्क आर्जन गर्न सफल भएको छ। गत वर्ष ६ महिनामा १ अर्ब १६ करोड खुद बीमा शुल्क आर्जन गरेको कम्पनीले अहिले १ अर्ब १७ करोड आर्जन गरेको छ ।
२ अर्ब चुक्ता पुँजी भएको कम्पनीको जगेडा कोषमा ३५ करोड ९० लाख संचित छ। जगेडा कोष रकम ८ प्रतिशतले वृद्धि भएको छ । जीवन बीमा कम्पनीको एउटा महत्वपूर्ण सूचक जीवन बीमा कोषको आकार ४४ दशमलव ३८ प्रतिशतले वृद्धि हुँदै ४ अर्ब ८ करोड पुगेको छ। गत वर्ष पुष मसान्तसम्म जीवन बीमा कोषमा २ अर्ब ८२ करोड संचित थियो ।
प्रकाशित तथ्यांक अनुसार कम्पनीको वार्षिक प्रति शेयर आम्दानी ११ रुपैयाँ ६२ पैसा र प्रति शेयर नेट्वर्थ १२० रुपैयाँ १९ पैसा छ । कम्पनी अहिले रिलायन्स लाइफ इन्स्योरेन्ससँग मर्जर प्रक्रियामा रहेको छ ।
