काठमाडौं । नेपाल लाइफ इन्स्योरेन्सले चालु आर्थिक वर्षको दोश्रो त्रैमासको रिपोर्ट सार्वजनिक गरेको छ। रिपोर्ट अनुसार कम्पनीको जगेडा कोष घट्दा आधारभूत रुपमा कम्पनी कमजोर देखिन थालेको छ । जगेडा कोष ७२ प्रतिशत भन्दा धेरैले घट्दै ४८ करोड ४ लाखमा झरेको छ । ८ अर्ब माथि चुक्ता पुँजी भएको कम्पनीको जगेडामा ५० करोड पनि नहुँदा कम्पनीको किताबी मूल्य ११६ रुपैयाँ मात्र छ । अघिल्लो वर्ष १३४ रुपैयाँ किताबी मूल्य भएको कम्पनीको किताबी मूल्य १३ दशमलव ६४ प्रतिशतले घटेको छ ।
खुद बीमा शुल्क आर्जन नगन्य प्रतिशतले वृद्धि भएको छ । गत आर्थिक वर्ष १८ अर्ब ११ करोड रहेको खुद बीमा शुल्क आर्जन रकम अहिले १ दशमलव ६० प्रतिशतले वृद्धि हुँदै १८ अर्ब ४० करोड पुगेको छ ।
८ अर्ब २० करोड चुक्ता पुँजी भएको कम्पनीको जगेडामा ४८ करोड संचित छ । जीवन बीमा कोष १ खर्ब ५० अर्ब पुगेको छ । समिक्षा अवधिमा जीवन बीमा कोष २० दशमलव ८४ प्रतिशतले वृद्धि भएको छ ।
कम्पनीको खुद नाफा २३७ प्रतिशतले वृद्धि हुँदै ४४ करोड पुगेको छ। प्रकाशित तथ्यांक अनुसार कम्पनीको प्रति शेयर आम्दानी १० रुपैयाँ ७३ पैसा छ ।
