काठमाडौं । नेको इन्स्योरेन्स कम्पनीका प्रमुख कार्यकारी अधिकृत अशोक कुमार खड्काको वार्षिक तलब सुविधा ८० लाख ९० हजार रुपैयाँ रहेको छ । खड्काले गत आर्थिक वर्ष २०७८/७९ मा तलब भत्ता बापत उक्त रकम बुझेका हुन् । उनले यस बाहेक नियम अनुसार कर्मचारी बोनस सुविधा पाउने छन् । कम्पनीले खड्कालाई गाडी सुविधा पनि दिएको छ । कम्पनीले सञ्चालकहरुलाई बैठक भत्ता बापत १२ लाख ३५ हजार रुपैयाँ भुक्तानी गरेको छ ।
कम्पनीको पन्ध्रौ बार्षिक साधारण सभाको निर्णय अनुसार प्रचलित दुर्घटना बीमा पोलिसी अन्तर्गत संचालक समितिका अध्यक्ष एवं सदस्यहरुलाई बीमाङ्क रकम ५० लाख रुपैयाँको व्यक्तिगत दुर्घटना बीमा र स्वास्थ्य बीमालेखको सीमा भित्र रही संचालक समितिका अध्यक्ष, सदस्य र निजका आश्रित परिवारको स्वास्थ्य बीमा गरे वापत कम्पनीले जम्मा एक लाख १५ हजार ५०० रुपैयाँ बीमाशुल्क भुक्तानी गरेको छ ।
कम्पनीको संचालक समितिले आ.व. २०७८/७९ को लागि २६ करोड २४ लाख रुपैयाँको बोनस शेयर तथा सो रकममा लाग्ने कर एक करोड ३८ लाख रुपैयाँको नगद लाभांशको रुपमा प्रस्ताव गरेको छ । उल्लेखित बोनस शेयर २६ करोड २४ लाख रुपैयाँमा महाविपत्ति कोषबाट २ करोड २७ लाख रुपैयाँ सारिएको छ ।
