काठमाडौं । कालिञ्चोक दर्शनले निष्काशन गरेको आइपिओमा माग भन्दा बढि आवेदन पछि आजदेखि निष्काशन बन्द गर्ने भएको छ । कम्पनीले सर्वसाधारणका लागि माघ ३ गतेदेखि प्रतिकित्ता एक सय रुपैयाँ अंकित दरमा आठ लाख ९६ हजार चार सय कित्ता बिक्री खुला गरिरहेको छ ।
कम्पनीले आफ्नो जारी पूँजी ६० करोड को १८ प्रतिशतले हुने १० करोड ८० लाख बराबरका १० लाख ८० हजार कित्ता सेयर सर्वसाधारणका लागि छुट्याएको छ । यसमध्ये १० प्रतिशत अर्थात् एक लाख आठ हजार कित्ता सेयर वैदेशिक रोजगारीमा रहेका नेपालीका लागि निष्कासन गरिसकेको छ भने पाँच प्रतिशत अर्थात् ५४ हजार कित्ता सामूहिक लगानी कोषमा बाँडफाँड गरिसकेको छ ।
त्यसैगरी दुई प्रतिशतले हुने २१ हजार ६ सय कित्ता कर्मचारीका लागि छुट्याइएको छ । सर्वसाधारणले बाँकी आठ लाख ९६ हजार चार सय कित्ताका लागि आवेदन दिन सक्ने कम्पनीले जनाएको छ । सर्वसाधारणका लागि छुट्टाइएको ८ लाख ९६ हजार ४०० कित्ता शेयर केबल ८९ हजार ६४० जनाले मात्रै प्राप्त गर्नेछन् । तर कालिञ्चोक दर्शनको आइपिओमा १० लाख भन्दा बढिको आवेदन परिसकेको जनाइएको छ । यसले गर्दा अधिकतम १० कित्ताको लागि मात्रै आवेदन दिए पुग्छ ।
निष्कासन गरिने सेयरमा सर्वसाधारणले छिटोमा आगामी माघ ६ गतेसम्म र सो अवधिमा मागबमोजिम आवेदन नपरे माघ १७ गतेसम्म न्यूनतम १० कित्तादेखि अधिकतम चार हजार नौसय ९० कित्तासम्मको लागि आवेदन दिन सक्ने छन् ।
लगानीकर्ताले नेपाल धितोपत्र बोर्डबाट स्वीकृति प्राप्त आस्वा सदस्य बैंक तथा वित्तीय संस्था र तिनका तोकिएका शाखा कार्यालयबाट ‘सी आस्वा’ प्रणालीमार्फत तथा अनलाइनमार्फत ‘मेरो सेयर’ प्रयोग गरी खरिदको आवेदन दिन सकिने छन् । कम्पनीको सेयर निष्कासन तथा बिक्री प्रबन्धकमा नबिल इन्भेष्टमेन्ट बैंकिङ लिमिटेड रहेको छ । कम्पनीले दोलखाको चरिकोटबाट कालिञ्चोक भगवती मन्दिरसम्मको केबलकार सञ्चालन गरिरहेको छ । कम्पनीलाई केयर नेपालले ‘केयरएन्पी बिबी प्लस आइआर’ प्रमाणपत्र प्रदान गरेको छ ।
