काठमाडौं । नेपाल राष्ट्र बैंकले सुपरिवेक्षकीय सूचना प्रणाली ‘एसआईएस रिपोर्टिङ पोर्टल’ को विकास गरेको छ । यस प्रणालीको विकास सँगै अव बैंक तथा वित्तीय संस्था र पुर्वाधार विकास बैंकहरुले समेत दैनिक तरलता विवरण अर्को कार्यदिनको मध्यान्ह १२ बजेसम्म र अन्तर बैंक कारोबारको विवरण कारोबार सम्पन्न गर्ना साथ सुपरिवेक्षकीय सूचना प्रणाली मार्पत नेपाल राष्ट्र बैंकमा पठाउनु पर्ने भएको छ ।
नेपाल राष्ट्र बैंकबाट इजाजतपत्र बैंक तथा वित्तीय संस्थाहरुले नेपाल राष्ट्र बैंकमा पेश गर्नु पर्ने तथ्याङ्क तथा जानकारीहरु सुपरिवेक्षकीय सूचना प्रणालीमा तोकिए बमोजिमका रिटर्नहरु तथा एडहक तथ्याङ्क र विवरणहरु निर्धारित समयावधिभित्र पठाउनु पर्नेछ । यस व्यवस्था बमोजिम २०७८ असार एक गतेदेखि राष्ट्र बैंकमा पेश गर्नुपर्ने रिर्टनहरु सुपरिवेक्षकीय सूचना प्रणाली रिपोर्टिङ पोर्टलमा समेत अनिवार्य अध्यावधिक गर्नुपर्नेछ ।
अहिलेको अवस्थामा बैंकहरुले जति पनि विवरणहरु सुपरिवेक्षकीय सूचना प्रणालीमा पठाउनु पर्ने व्यवस्था छ ति सबै विवरणहरु सुपरिवेक्षकीय सूचना प्रणाली रिपोर्टिङ पोर्टलमा समेत अद्यावधिक गराउनु पर्ने भएको हो । यहि नियम विकास बैंक, माइक्रोफाइनान्स र पुर्वाधार विकास बैंकलाई समेत लागु हुनेछ ।
ब्याजदर संशोधन गरेको ७ दिनभित्र निक्षेप तथा कर्जाको ब्याजदर सम्बन्धी विवरण यहि सुपरिवेक्षकीय सुचना प्रणाली रिपोर्टिङ पोर्टलमा अद्यावधिक गर्नुपर्ने छ ।
