काठमाडौं । शेयरधनीहरुलाई लाभांश दिन नसकेको एनआइसी एशिया बैंकका प्रमुख कार्यकारी अधिकृत रोशन कुमार न्यौपानले एक वर्षमा २ करोड ३४ लाख तीन हजार रुपैयाँ बराबरको तलब भत्ता तथा अन्य सुविधाहरु बुझेका छन् ।
न्यौपानेले गत आर्थिक वर्ष २०७८/७९ मा भत्ता सहित कुल वार्षिक तलब बापत एक करोड ८० लाख रुपैयाँ प्राप्त गरेका छन् । नियम अनुसार उनले कर्मचारी बोनस बापत ५२ लाख ५७ हजार रुपैयाँ प्राप्त गरेका छन् । बैंकले उनलाई अन्य सुविधा बापत ९० हजार मात्रै दिएको छ । बाणिज्य बैंकहरु मध्ये सर्वाधिक मुनाफा आर्जन गर्न सफल बनाएका न्यौपानेलाई बैंकले प्रोत्साहन भत्ता भने दिएको छैन ।
यस आर्थिक वर्षमा बैंकको कुल कर्मचारी खर्च भने ४ अर्ब ४० करोड रुपैयाँ रहेको छ । सर्वाधिक धेरै कर्मचारी मुभमेन्ट हुने यस बैंकले कर्मचारीहरुलाई टिकाउन सकिरहेको छैन । प्रमुख कार्यकारी अधिकृतमा पनि न्यौपाने यस्ता व्यक्ति हुन् जसले सफलतापुर्वक दोस्रो कार्यकाल सम्हालिरहेका छन् ।
बाणिज्य बैंकहरु मध्ये एनआइसी आक्रामक बैंकका रुपमा चिनिन्छ । राष्ट्र बैंकले पूँजीकोष अनुपात कायम नगरेको भन्दै पछिल्ला दुई आर्थिक वर्षको मुनाफाबाट लाभांश वितरण गर्न समेत दिएको छैन । बैंकमा सञ्चालक समितिका पदाधिकारीहरु सर्वाधिक हाबी हुने गरेको पाइन्छ ।
बैंकले गत आर्थिक वर्षमा सञ्चालक समितिका पदाधिकारीहरुलाई बैठक भत्ता बापत एक करोड २ लाख रुपैयाँ भुक्तानी गरेको छ । गत वर्षमा १८३ वटा सञ्चालक समितिको बैठक बसेको देखिन्छ । यहि रोग नेपाल लाइफमा पनि छ । नेपालका सञ्चालकले अनावस्यक रुपमा सञ्चालक समितिको बैठक बसेर भत्ता बुझेको पाइए पछि नेपाल बीमा प्राधिकरणले कारबाही नै गरेको थियो ।
