काठमाडौं । मंसिर महिनामा बाणिज्य बैंकहरुले ५७ अर्ब २२ करोड रुपैयाँले निक्षेप बढाएका छन् । कार्तिकको तुलनामा बाणिज्य बैंकहरुले निक्षेप संकलनमा सुधार गर्न सके पनि कर्जा विस्तारलाई भने रोकेर राखेका छन् । मंसिर एक महिनामा बाणिज्य बैंकहरुले जम्मा २ अर्ब ६ करोड रुपैयाँले कर्जा विस्तार गरेका हुन् ।
असारको तुलनामा भने बाणिज्य बैंकहरुले जम्मा ७९ अर्ब १२ करोड रुपैयाँले निक्षेप बढाएका छन् भने कर्जा विस्तार ४८ अर्ब ८० करोड रुपैयाँले विस्तार गरेका छन् । असोजमा कर्जा विस्तार नभए पनि त्यस भन्दा अघिल्ला महिनामा राम्रै कर्जा विस्तार भएको थियो । चुनाव अगाडी बाणिज्य बैंकहरुबाट केहि निक्षेप बाहिरिए पनि समग्रमा प्रणालीमा निक्षेप भने बढेको छ ।
कार्तिक महिनामा ६ वटा बाणिज्य बैकहरुको निक्षेप बढेको छ भने ११ वटा बाणिज्य बैंकहरुको कर्जा विस्तार नै घटेको छ । बैंकहरुको महंगो व्याजदरका लागि व्यवसायिक कर्जा प्रवाह हुन सकेको छैन । अर्को तर्फ घरजग्गाको कारोबारमा मन्दी आउदा बैंकिङ कर्जा प्रभावित भएको हो ।
वैदेशिक रोजगारमा भएका नेपालीले पठाएको रेमिट्यान्सले निक्षेप बढे पनि आन्तरिक उत्पादन तथा उद्योगबाट निक्षेप प्रवाह हुन सकेको छैन । कर्जा विस्तारमा आक्रामक एनआइसी एशियाकै कर्जा विस्तार दुई अर्ब ९९ करोड रुपैयाँले खुम्चिएको छ । यसै अवधिमा निक्षेप पनि एक अर्ब ४६ करोडले घटेको छ ।
गत असारको तुलनामा एनसिसी बैंकको निक्षेप १५ अर्ब भन्दा धेरैले खुम्चिएको छ । कर्जा विस्तार पनि ९ अर्ब भन्दा माथिले घटेको छ । अर्थतन्त्रमा यसै गरी समस्या आइरहने हो भने अर्थतन्त्रमा अझ ठुलो समस्या पर्न सक्ने देखिन्छ । नेपालका बैंकिङ प्रणाली घरजग्गा धितोमा राखेर प्रवाह भइरहेको छ ।
