काठमाडौं । चुनावको सम्पुर्ण नतिजा सार्वजनिक हुँदा शेयर बजारमा भने भारि गिरावट देखिएको छ । राजनीतिक अन्योलता सँगै बैंकिङ तरलताको समस्याले अझै उग्र रुप लिने आकलन सँग शेयर बजारमा आजै ३१.९७ अंकको गिरावट आएको छ ।
चुनाव अगाडी बजारमा नयाँ तरलता आउने र नयाँ नेतृत्व चुनिने आशामा शेयर ह्वात्तै बढेको थियो । तर चुनाव पछि लगानीकर्ताले आशा गरे अनुरुप चुनावी परिणाम र बैंकिङ तरलताको समस्या समाधान नहुने संकेत सँगै बजार लगातार ओरालो झिरहेको छ ।
यदि बजारमा नयाँ तरलता नआउने हो भने छिट्टै नै बैंकहरु नयाँ कर्जा प्रवाह गर्नै नसक्ने अवस्थामा पुग्ने छन् । बैंकहरुले यस अवधिमा सुरक्षित खालेका घर कर्जा प्रवाह गरे पनि ओभर ड्राफ्ट कर्जा दिन सकेका थिएनन् । अर्को तर्फ घर जग्गामा चरम मन्दी आउदा यसको प्रत्यक्ष असर शेयर बजारमा पनि देखिन थालेको छ ।
साताको पहिलो दिन नेप्से सूचक ३१.९७ अंकले घटेर १८८५ दशमलब ३१ अंक कायम भएको छ । शेयर बजारमा दोहोरो अंकको गिरावट हुँदा १८० कम्पनीको शेयर मूल्यमा गिरावट आएको छ भने जम्मा २५ वटा कम्पनीको शेयर मूल्यमा सुधार आएको छ । कतिपय लगानीकर्ताले अझै बैंकिङ तरलता दुई वर्ष सुधार नहुने संकेत देखिएकोले अवको दुई वर्ष शेयर बजार तल्लै विन्दुमा रहन सक्ने विश्लेषण गरिरहेका छन् ।
आज सिवाइसिएल नेपाल लघुवित्त, समिट लघुवित्त र मैलुङ खोला जलविद्युत कम्पनीको शेयर मूल्य सर्वाधिक बढ्ने क्रममा सर्किट लागेको छ । नाडेप लघुवित्तको सर्वाधिक धेरै घट्ने क्रममा सर्किट लागेको छ । शिवम नविल बैंकको सर्वाधिक धेरै कारोबार हुँदा सोमबार समग्रमै एक अर्ब १० करोडको कारोबार भएको छ ।
