काठमाडौं । रिलायबल नेपाल लाइफ इन्स्योरेन्स कम्पनीले बीमा क्षेत्रमै पहिलो पटक प्रिमियम सहित प्राथमिक शेयर निष्काशन गर्ने भएको छ । जसका लागि कम्पनीले नेपाल धितोपत्र बोर्डमा पुनः निवेदन दिएको छ । कम्पनीले ११२ रुपैयाँ प्रिमियम सहित २१२ रुपैयाँमा प्राथमिक शेयर निष्काशन गर्ने भएको हो ।
कम्पनीले कुल २ अर्ब ४७ करोड ६८ लाख रुपैयाँ बराबरको प्राथमिक शेयर निष्काशन गर्नका लागि पुनः बोर्डमा निवेदन दिएको हो । कुलमध्ये ६ लाख कित्ता एक सय रुपैयाँमा कर्मचारीको लागि र १ करोड १४ लाख कित्ता सर्वसाधारणका लागि २१२ रुपैयाँको दरले आइपीओ निष्काशन गर्न बोर्डमा निवेदन पेश गरेको कम्पनीले जनाएको छ ।
प्राथमिक शेयर निष्काशन तथा बिक्री प्रवन्धक सिभिलमा क्यापिटल मार्केट रहेको छ । हालसम्म कुनै पनि बीमा कम्पनीहरुले प्रिमियममा प्राथमिक शेयर निष्काशन गरेका छैनन् । तर रिलायबलले पहिलो पटक यस्तो अभ्यास गरेको हो । प्राथमिक शेयर निष्काशनक पछि कम्पनीको चुक्ता पूँजी ४ अर्ब रुपैयाँ पुग्नेछ ।
हाल कम्पनीको चुक्ता पूँजी २ अर्ब ८० करोड रहेको छ । कम्पनीले प्रिमियममा आइपीओ निकाल्दा १ अर्ब २७ करोड ६८ लाख रुपैयाँ प्रिमियम संकलन गर्ने र उक्त रकम कम्पनीको जगेडा कोषमा जम्मा हुने छ ।
