काठमाडौं । नेपाल धितोपत्र बोर्डले वैदेशिक रोजगारीमा गएका नेपालीहरुलाई प्राथमिक शेयर निष्काशनको १० प्रतिशत अनिवार्य छुट्याउनु पर्ने व्यवस्था गरेको छ । बोर्डले धितोपत्र निष्काशन तथा बाँडफाँट (छैटौं संशोधन) निर्देशिका-२०७९ लागू गरे सँगै अवदेखि कम्पनीहरुले वैदेशिक रोजगारमा गएका नेपालीहरुलाई मात्रै १० प्रतिशत शेयर छुट्ट्याउनै पर्ने भएको छ ।
यस्तो शेयर नेपाल सरकारको सम्बन्धित निकायबाट श्रम स्वीकृति प्राप्त गरी विदेशमा रोजगारी गरिरहेका नेपालीका लागि छुट्ट्याइ बाँडफाँट गर्नै पर्नेछ । यस्तो शेयर निष्काशन गर्दा १५ दिनको म्याद दिनु पर्नेछ । आस्वा प्रणाली मार्फत आस्वा सदश्य बैंक तथा वित्तीय संस्थामा रहेको विप्रेषण बचत खाता मार्फत मात्र भुक्तानी गर्नु पर्नेछ ।
यस्तो आइपिओमा आवेदन दिनका लागि सम्बन्धित व्यक्तिले विप्रेषण (रेमिट्यान्स) बचत खातामा पछिल्लो छ महिनामा कम्तीमा ५० हजार नेपाली रुपैयाँ आफू रोजगार रहेको मुलुकबाट जम्मा गरेको हुनुपर्ने व्यवस्था गरिएको छ ।
वैदेशिक रोजगारमा गएका नेपालीहरुलाई शेयर बाँडफाँड गरिसके पछि मात्रै सर्वसाधारणका लागि आह्वान गर्न पाइनेछ । यदि यस्तो समुहमा छुट्ट्याइएको शेयर बिक्री नभएमा सर्वसाधारणलाई बिक्री गर्न सकिनेछ । विदेशमा रहेका नेपालीहरुले विद्युतिय माध्यमबाट हितग्राही खाता खोल्दा विद्युतिय माध्यमबाटै ग्राहक पहिचाहन गरी रुजु गर्नु पर्नेछ । यसरी आवेदन दिइसकेका व्यक्तिले पुनः सर्वसाधारण समुहबाट भने आवेदन दिन पाइने छैन ।
