काठमाडौं । लगातार घटिरहेको शेयर बजार तिहार विदा अगाडी दोहोरो अंकले सुधार भएको छ । सर्वोच्चले नयाँ स्टक एक्सचेन्जको लाइसेन्स प्रकृयाँ रोक्न अल्पकालिन आदेश दिए सँगै शेयर बजार भने बढेको छ । ठुलो लगानीकर्ताले नयाँ स्टक एक्सचेन्जका लागि पैसा जोहो गर्दा पछिल्लो समय शेयर बजार बढ्न सकेको छैन ।
यसै क्रममा सर्वोच्चले तत्काल नयाँ लाइसेन्सको प्रकृयाँ रोक्ने आदेश दिए सँगै अव चुनाव पछि मात्रै लाइसेन्स प्रकृया अगाडी बढ्नेछ । चुनाव पछि नयाँ राजनीतिक समिकरण आउने हुँदा अहिलेको अवस्थाकै निरन्तरता पाउछ पाउदैन भन्न सकिदैन त्यसैले पनि आज शेयर बजारमा केहि सुधार देखिएको हो ।
बजार बढ्नुको अर्को कारण तिहार पछि बैंकिङ प्रणालीमा नयाँ निक्षेप आउने र तरलता केहि सहज हुने अनुमान गरिएको छ । दशै तिहारका लागि व्यवसायीले ठुलो रकम आयातका लागि बाहिर पठाएका थिए । अव उक्त व्यवसायीले उपभोक्ताबाट उक्त रकम फिर्ता लिने भएकाले बैंकिङ प्रणालीमा थप निक्षेप आउने र तरलता सहज हुने अनुमान गरिएको छ ।
यस साताको पहिलो तथा अन्तिम कारोबारमा नेप्से सूचक १४.३५ अंकले सुधार भएको छ । सूचकमा सुधार सँगै कारोबार रकममा पनि सामान्य सुधार देखिएको छ । आज ५१ करोड ६८ लाख रुपैयाँको शेयर कारोबार भएको छ ।
आज १३५ वटा कम्पनीको शेयर मूल्य बढ्दा ३९ वटाको घटेको छ । सर्वाधिक धेरै रु.रु र सयपत्री हाइड्रोपावरको शेयर मूल्य बढ्ने क्रममा सकारात्मक सर्किट लागेको छ । सबैभन्दा धेरै गुमाउनेमा म्युचुअल फण्ड छन् । सर्वाधिक धेरै एभरेष्ट बैंकको ५ करोड १६ लाख रुपैयाँको खरिद बिक्री भएको छ ।
बजार लगातार घटिरहेकाले पछिल्ला दिनमा लगानीकर्ताको सक्रियता पनि घटिरहेको छ । एकोहोरो घटिरहेकाले ठुला तथा अन्य लगानीकर्ता बजार बाहिरै छन् । अल्पकालिन लगानीकर्ता बाहेक अन्य लगानीकर्ता बजार कहिले बढ्छ भनेर कुरिरहेका छन् । जवसम्म बजार बढ्ने संकेत देखिदैन त्यो समुहको बजारमा प्रवेश हुने देखिदैन ।