काठमाडौं । गभर्नर महा प्रसाद अधिकारी २०७९ असोज २४ देखि ३० सम्म संयुक्त राज्य अमेरिकाको वासिङ्गटन डि.सी.मा आयोजित आईएमएफ–विश्व बैंकको वार्षिक बैठकमा सहभागी भएर स्वदेश फर्किएका छन् ।
उक्त कार्यक्रममा १९० सदस्य राष्ट्रका केन्द्रीय बैंक तथा मौद्रिक अधिकारीहरूको सहभागिता रहेको थियो । बैठकमा बोर्ड अफ गभर्नरका अध्यक्ष हसन अबदुल्ला, विश्व बैंक समुहका अध्यक्ष डेभिड मालपास र आइएमफका प्रवन्ध निर्देशक क्रिष्टालिना जर्जीभाले संबोधन गरेका थिए । उनहरुले विश्व अर्थतन्त्रमा देखिएका जोखिमहरू र यसको निराकरणको लागि विश्वले अपनाउनु पर्ने नीतिगत उपायकाबारे प्रकाश पारेका थिए । गभर्नर अधिकारीले विभिन्न कार्यक्रम तथा बैठकमा सहभागिता जनाएका थिए ।
उनि सार्क मुलुकका गभर्नरहरूसँग सामूहिक ब्रेकफाष्ट मिटिङमा सहभागी भएका थिए । सोही कार्यक्रमको अवसरमा बङ्गलादेश बैंकका गभर्नर अब्दुर रौफ तालुकदार, भारतीय रिजर्व बैंकका गभर्नर शक्तिकान्त दास, माल्दिभ्स मनिटरी अथिरिटिका गभर्नर अलि हसिम, स्टेट बैंक अफ पाकिस्तानका गभर्नर जमिल अहमद र सेन्ट्रल बैंक अफ श्रीलंकाका गभर्नर डा. पि. नन्दलाल विरासिंघेसँग द्विपक्षीय रूपमा क्षेत्रीय अर्थ व्यवस्थाका बारेमा छलफल भएको थियो ।
त्यसैगरी गभर्नर अधिकारीले भारतीय अर्थमन्त्री निर्मला सितारमणसँग पनि अनौपचारिक भेटवार्ता गरेका थिए । उक्त वार्षिक बैठकमा भाग लिन गभर्नर अधिकारीका साथै आर्थिक अनुसन्धान विभागका कार्यकारी निर्देशक डा. प्रकाशकुमार श्रेष्ठ सहभागी भएका थिए ।
