काठमाडौं । मर्जर प्रकृयाँमा रहेको प्राइम लाइफ इन्स्योरेन्स कम्पनीले लाभांश घोषणा गरेको छ । कम्पनीको कार्तिक २ गते बुधावार दिनको ४ बजे बसेको सञ्चालक समितिको बैठकले आर्थिक वर्ष २०७७/७८ को मुनाफाबाट १३ प्रतिशत बोनस शेयर वितरण गर्ने प्रस्ताव गरेको छ ।
कम्पनीले चुक्ता पूँजी २ अर्ब ७७ करोडको १३ प्रतिशत अर्थात ३६ करोड एक लाख रुपैयाँ बोनस शेयर दिने भएको छ । प्रस्तावित बोनस शेयर वितरण पछि तीन अर्ब १३ करोड रुपैयाँ पुग्नेछ । कम्पनीले कर प्रयोजनका लागि एक करोड ९० लाख रुपैयाँ नगद लाभांशको पनि प्रस्ताव गरेको छ ।
प्रस्तावित लाभांश बीमा समितिले स्वीकृत गरे पछि मात्रै आगामी वार्षिक साधारणसभामा अनुमोदनका लागि पेश गरिने कम्पनीले जनाएको छ । प्राइमले बीमितहरुका लागि भने यस अगाडी नै बोनसदर सार्वजनिक गरिसकेको छ । कम्पनीले आर्थिक वर्ष २०७६/७७ मा १५ प्रतिशत बोनस शेयर दिएको थियो ।
हाल प्राइम, गुराँस र युनियन लाइफ मर्जर प्रकृयाँमा छन् । मर्जरको सहमतिपत्रमा हस्ताक्षर गरेको धेरै लामो समय भइसकेको छ । तर तीन वटा कम्पनी मर्जरको अन्तिम निर्णयमा अझै पुग्न सकेका छैनन् ।
