काठमाडौं । आइएमई लाइफ इन्स्योरेन्स कम्पनीले मर्जरमा नगइ बीमा समितिलेको तोकेको न्युनतम चुक्ता पूँजी जुटाउने तयारीमा जुटेको छ । कम्पनीले विध्यमान संस्थापकहरु सँग सत प्रतिशत पूँजी थप्न आह्वान गरेको छ ।
कम्पनीको असोज २६ गते सम्पन्न पाँचौ वार्षिक साधारणसभाले चुक्ता पूँजी सत प्रतिशत बृद्धि गर्ने निर्णय गरेको थियो । साधारणसभाले पारित गरेको उक्त निर्णयलाई पनि बीमा समितिले स्वीकृति प्रदान गरिसकेको छ । साधारणसभा र बीमा समितिबाट स्वीकृत भए सँगै कम्पनीको असोज ३१ गते बसेको सञ्चालक समितिको बैठकले साविक शेयरधनीहरुबाट शेयरमा लगानी भएको रकमको थप सत प्रतिशत पूँजी माग गर्ने निर्णय गरेको थियो ।
संस्थापक शेयरधनीहरुले मंसिर ५ गतेसम्म आफुले थप गर्नु पर्ने पूँजी बापतको रकम जम्मा गर्न अनुरोध गरिएको छ । कम्पनीको हालको चुक्ता पूँजी एक अर्ब ४० करोड रुपैयाँ रहेको छ । सत प्रतिशत पूँजी थप गरे सँगै २ अर्ब ८० करोड रुपैयाँ पुग्नेछ । सर्वसाधारणका लागि ३० प्रतिशतले हुन आउने गरी आइपिओ निष्काशन पछि चुक्ता पूँजी ४ अर्ब पुग्नेछ । कम्पनीले सर्वसाधारणका लागि एक अर्ब २० करोड रुपैयाँको आइपिओ निष्काशन गर्न सक्नेछ ।
बाँकी एक अर्ब भने कम्पनीले जगेडा कोषमा भएको रकमबाट बोनस दिएर पुर्याउने योजना बनाएको छ । यदि जगेडाकोषबाट लाभांश वितरण गर्न नपुगेमा कम्पनीले थोरै हकप्रद शेयर निष्काशन गर्नु पर्नेछ ।
