काठमाडौं । बीमा नियमावली बनाउनका लागि समिति गठन भएको छ । कानुन मन्त्रालयका सहसचिव सुशिल कोइरालाको संयोजकत्वमा समिति गठन भएको हो । यस समितिमा बीमा समितिका सुशिलदेव सुवेदी समेत रहेका छन् ।
नियमावली बनाउने काम मन्त्रालयको हो । तर बीमा समितिले नै नियमावलीको मस्यौदा बनाउने तयारी गरेको छ । सकेसम्म चुनाव अगाडी नै नियमावली बनाउने गरि काम सुरु गरिएको बीमा समितिका कार्यकारी निर्देशक राजुरमण पौडेलले जानकारी दिए ।
अहिलेकै सरकार हुँदा नियमावली बनाउन सकियो भने धेरै सहज हुनेछ । यहि सरकारले ऐन बनाएको हुँदा नियमावली बनाउदा पनि ऐनकै मर्म अनुसार बनाउन सजिलो हुने पौडेलको तर्क छ । उनले भने ‘यहि सरकार हुँदा नियमावली बनाउन सकियो भने धेरै छिटो र सजिलो हुनेछ । तर चुनाव पछि अर्को सरकार आउदा उक्त सरकारलाई ऐन बुझेर ऐन बनाउनु पर्ने हुन्छ ।’
चुनाव पछि पनि यहि सरकार रहन्छ भन्ने छैन । साथै मन्त्रीहरु पनि फेरिन सक्छन् । मन्त्री फेरिदा सचिव तथा सहसचिव पनि फेरिन्छन् । त्यसैले चुनाव पछि नियमावली जारी गर्न धेरै गाह्रो पर्ने देखिन्छ । तर नियमावली बनाउने काम मन्त्रालयकै भएको हुँदा मन्त्रालयले जसरी पनि नियमावली बनाउनै पर्ने हुन्छ ।
ऐनको कार्यान्वयन गर्न नियमावली अनिवार्य बन्नु पर्छ । नियमावली नआइ बीमा समितिले पनि ऐन मुनाविक काम गर्न सक्दैन । बीमा समितिले ऐन बनाएकै टिमलाई परिचालन गरि छिटो भन्दा छिटो नियमावली बनाउने काम सुरु गरिसकेको छ ।
