काठमाडौं । दीर्घकालीनरुपमा स्थिर रहने गरी प्रत्येक जीवन बीमकलाई बोनश दर तयार पार्न बीमा समितिले निर्देशन दिएको छ । जीवन बीमा कम्पनीहरुलाई उपलब्ध गराइएको पाँच पाने निर्देशिकामा जीवन बीमकले बोनश वितरण र बोनश दर निर्धारण गर्दा सन्दर्भ सामाग्रीको रुपमा निर्देशिका उपयोगी हुने उल्लेख गरेको छ ।
आफ्नो आधिकारिक बीमांकीमार्फत् बोनश फिलोशपि तयार पारेर बीमकले बीमांकी प्रतिवेदन पेश गर्दा प्रत्येक पटक बोनश फिलोशपि पनि पेश गर्नुपर्ने प्रावधान निर्देशिकामा रहेको छ ।
पहिलो पटक समितिले टर्मिनल बोनश (अन्तिम बोनश) र स्पेशल बोनश(विशेष बोनश) को समेत प्रावधान ल्याएको छ । टर्मिनल बोनशमार्फत् जीवन बीमकले लामो समयसम्म निरन्तर सकृय अवस्थामा रहेको जीवन बीमालेखवापत बीमितलाई नियमित बोनश (सिम्पल रिभर्सनरी बोनश)को अतिरिक्त थप बोनश रकम प्रदान गर्न सक्नेछन् । तर यस्तो बोनश प्राप्त गर्नको लागी बीमालेखमा तोकिएको न्यूनत्तम अवधिसम्म बीमालेख सकृय हुनैपर्छ, अर्थात् बीमितले नियमितरुपमा बीमाशुल्क भुक्तानी गरेर बीमालेख सकृय राखेको हुनुपर्छ ।
विशेष बोनश अन्तर्गत जीवन बीमाकोषको लगानीवापत प्राप्त हुने लाभबाट खर्च कटाएर बाँकी रहने बचत रकमबाट जीवन बीमकले थप बोनशको रुपमा विशेष बोनश वितरण गर्न सक्ने प्रावधान निर्देशिकामा तोकिएको छ । तर एक पटकको लागी यस्तो बोनश वितरण गर्दा भावी वर्षहरुमा समेत यसको प्रभाव कस्तो पर्छ र बीमितको अपेक्षामा पार्ने प्रभावबारे समेत ध्यान पु¥याउन निर्देशिकामा सुझाव दिइएको छ ।
निर्देशिकामा नौ बुँदे तालिका समेत समावेश गरिएको छ । यो तालिकामा दिइएको शीर्षक तथा विवरण अनुसार जीवन बीमकले बीमांकीको सहयोगमा बोनश फिलोशपि तयार पारेर समितिमा पेश गर्नुपर्नेछ ।
तालिकामा परिचय, सहभागीतामूलक बीमालेखको व्याख्या, विभिन्न प्रकारका बोनशको व्याख्या, बोनश वितरण प्रकृया, बीमित र शेयरधनीबीच सन्तुलन, बोनश आय गर्न सक्ने क्षमता, लगानी रणनीति, सुशासन र भावी बोनश सम्बन्धी व्यवस्था विषयक सूची समावेश गरिएको छ ।
जीवन बीमकले वितरण गर्ने बाेनश दरमा स्थिरता कायम गर्नकाे लागी बीमा समितिले तीन वर्ष अघि भावी बाेनश(फ्युचर बाेनश) सम्बन्धी प्रावधान लागू गरेकाे थियाे । यसबाहेक बाेनश सम्बन्धमा बीमा समितिले कुनै अन्य प्रावधान कार्यान्वयनमा ल्याएकाे थिएन। समितिले बाेनश फिलाेशपि सम्बन्धी व्यवस्था पहिलाे पटक कार्यान्वयनमा ल्याएकाे हाे ।
