काठमाडौं । सरकारले उच्चस्तरीय तलब सुविधा आयोग गरेको छ । उक्त आयोजको संयोजकमा पूर्व मुख्यसचिव लीलामणी पौड्याल र सदश्यहरुमा सूर्या लाइफका पुर्व प्रमुख कार्यकारी अधिकृत तथा नेपाल राष्ट्र बैंकका पूर्व कार्यकारी निर्देशक शिवनाथ पाण्डे र पूर्व सचिव विमल वाग्ले रहेका छन् ।
सरकारले राष्ट्रसेवक कर्मचारी र श्रमिकहरुको न्युनतम तलब, भत्ता तथा पारिश्रमिक पुनरावलोकन गर्न उच्चस्तरीय तलब सुविधा आयोग गठन गरेको हो । अर्थमन्त्री जनार्दन शर्माले मंगलबार संयोजकमा पौडेल सहित सदश्यहरुमा पाण्डे र वाग्लेलाई नियुक्ति पत्र दिएका हुन् ।
सरकारले चालु आर्थिक वर्षको बजेट वक्तव्य अनुरुप यस्तो उच्चस्तरीय आयोग गठन गरेको हो । आयोगले नेपाल नेपाल सरकारले निर्धारण गरेको मर्यादाक्रम बमोजिम राष्ट्रसेवक कर्मचारीहरूको तलबमा समायोजन गर्न सिफारिस गर्नेछ । त्यस्तै नेपालका सम्पूर्ण श्रमिकहरूको पारिश्रमिक, सेवा तथा सुविधाका मापदण्डहरु पनि सिफारिस गर्नेछ ।
आयोगलाई तीन महिनाको समय दिइएको छ । आवस्यक परेका खण्डमा मन्त्रिपरिषद्ले थप समय दिन सक्नेछ । आयोगका संयोजकको मन्त्री सरह र सदस्यहरूको राजपत्रांकित विशिष्ट श्रेणी सरह पारिश्रमिक तथा मर्यादाक्रम हुनेछ ।
