काठमाडौं । सामाजिक सुक्षा कोषले दुई नयाँ शाखा विस्तार गरेको छ । कोषले प्रदेश न.१ को बिराटनगर र मधेश प्रदेशको सिमरामा शाखा कार्यालय विस्तार गरेको हो । उक्त शाखाको उद्घाटन भने श्रम, रोजगार तथा सामाजिक सुरक्षा मन्त्री शेरबहादुर कुँवरले भर्चुअल माध्यमबाट गरेका हुन् ।
कोषमा रहेका रोजगारदाता र योगदानकर्तालाई सहजता प्रदान गर्न उक्त दुई स्थानमा शाखा स्थापन गरिएको श्रम, रोजगार तथा सामाजिक सुरक्षा मन्त्री कुँवरले बताए । कोषले योगदानकर्तालाई प्रदान गरिने भुक्तानी, सापटी दिने विषयमा अग्रसर भई काम गर्दै आएको समेत उनले बताए । साथै नयाँ शाखा विस्तारसँगै सामाजिक सुरक्षा कोष चलायमान भएको सन्देश दिन चाहेको उनको भनाई । आगामी दिनमा आवश्यकता अनुरुप थप कोषका शाखा विस्तार गर्ने मन्त्री कुँवरले बताए ।
यस कोष सञ्चालनमा आएको करिब ३ वर्ष वित्न लाग्दा १७ हजार ३ सयभन्दा बढी रोजगारदाता सामेल भएको मन्त्रालयले जनाएको छ । साथै हाल ३ लाख ५५ हजारभन्दा बढी श्रमिक कोषमा आवद्ध छन् । हालसम्म कोषले २२ अर्ब ३२ करोडभन्दा माथिको रकम संकलन गरिसकेको कोषले जनाएको छ ।
एक हप्ताअघि कोषले योगदानकर्तालाई कोषबाट सापटी दिने सेवा सुरु गरेको थियो । एक हप्ताको समयअवधिमा करिब ८० जना योगदानकर्ताले सापटी सेवा समेत लिइसकेको मन्त्रालयले जनाएको छ । हाल कोषले विभिन्न चार प्रकारका स्किमबाट योगदानकर्तालाई सुविधा प्रदान गर्दै आइरहेको छ ।
