काठमाडौं । सहकारी विभागले सहकारी संस्थाहरु एक पछि अर्को डुबेका समाचार बाहिन थाले पछि १६ बुँदे निर्देशन जारी गरेको छ । विभागले सहकारीहरुलाई साप्ताहिक, मासिक, त्रैमाशिक, अर्धवार्षिक र वार्षिक वित्तीय सूचकहरु सहकारी संस्थाका शेयरधनी, निक्षेपकर्ता, ऋणीलाई जानकारी गराउनु पर्ने व्यवस्था गरेको छ ।
विभागले मौद्रिक नीतिमा भएका कतिपय व्यवस्था तथा सुझावका आधारमा सहकारी संस्था, सहकारीका आम शेयर सदश्यहरु र केन्द्रिय संघ र सहकारी बैंकका लागि छुट्टा छुट्टै निर्देशन जारी गरेको छ । विभागले सहकारीहरुलाई संस्थागत सुशासन कायम गर्न निर्देशन दिएको छ । घाटामा रहेका सहकारी संस्थाहरुलाई नाफामा सञ्चालन नहुञ्जेल मुनाफा वितरण नगर्न, सञ्चालक तथा कर्मचारीको सुविधा कटौती गर्न, प्रशासनिक खर्च घटाउन निर्देशन दिएको छ ।
विभागले राष्ट्र बैंकले जस्तै सहकारीहरुलाई पनि दीर्घकालिन स्रोत नभइ कर्जा प्रवाह नगर्न निर्देशन दिएको छ । सहकारीहरुलाई ठुला बचत भन्दा पनि आवधिक किसिमका साना साना बचत संकलनमा जोड दिन अनुरोध गरेको छ । सहकारीहरुलाई पनि राष्ट्रिय लेखामान अनुरुप नै लेखापरीक्षण गर्न निर्देशन दिइएको छ ।
विभागले सहकारीका सदश्यहरुलाई नियतबस प्रवाह गरिएका सूचनाको पछि नलागी वास्तविक सूचना लिएर मात्रै अगाडी बढ्न अनुरोध गरेको छ ।
