काठमाडौं । नेशनल इन्स्योरेन्स कम्पनीले रिलायन्स स्पिनिङ मिल्सलाई १५ करोड रुपैयाँको अग्रिम दाबी भुक्तानी गरेको छ । कम्पनीले आफ्नो दायित्व भित्रको २६ करोड मध्ये १५ करोड रुपैयाँ अग्रिम भुक्तानी गरेको हो ।
रिलायन्स स्पिनिङ मिल्समा २०७८ कार्तिक २ गतेको बाढीले ५२ करोड रुपैयाँको क्षति भएको थियो । सर्भेयरको प्रतिवेदन अनुसार उद्योगको मेसिन, गोदाममा बाढीले ५२ करोड रुपैयाँको क्षति भएको पाइएको छ । नेशनल इन्स्योरेन्स कम्पनी सहित अन्य बीमा कम्पनीले को- इन्स्योरेन्समा बीमा गरेका थिए । कम्पनीले ९ अर्ब ८२ करोड बीमाङ्क बराबरको बीमा गरेको थियो ।
सर्भेयरको रिपोर्ट अनुसार कम्पनीको आफ्नो दायित्व भित्रको २६ करोड रुपैयाँ मध्ये प्रारम्भिक रुपमा १५ करोड रुपैयाँ भुक्तानी गरिएको कम्पनीले जनाएको छ । कम्पनीले आयोजना गरेको एक कार्यक्रममा नेशनल इन्स्योरेन्स कम्पनीका प्रमुख कार्यकारी अधिकृत सिद्धार्थ मजुमदारले रिलायन्स मिल्सका जनरल म्यानेजर अनिल सोमानीलाई उक्त रकम बराबरको चेक हस्तान्तरण गरेका छन् ।
दाबी भुक्तानी कार्यक्रममा नेशनलका प्रमुख कार्यकारी अधिकृत मजुमदार र चार्टर्ड एकाउन्टेन्ट पंकज गुलाटीको उपस्थिति रहेको थियो त्यस्तै रिलायन्स स्पिनिङ मिल्सका तर्फबाट जनरल म्यानेजर अनिल सोमानी सहित वित्तीय विभाग प्रमुख मधुसुदन लुइटेलको उपस्थित रहेको थियो । बाँकी भुक्तानी आवस्यक कागजपत्र पुरा भए पछि छिटै भुक्तानी गरिने प्रमुख कार्यकारी अधिकृत मजुमदारले बताए ।
