काठमाडौं । सोमबार नेप्से सूचक १८.०३ अंकले सुधार हुँदा सर्वाधिक धेरै बरुण हाइड्रोपावर इमर्जिङ नेपालको शेयर मूल्य बढ्ने क्रममा सकारात्मक सर्किट लागेको छ । मूल्य समायोजन पछि घटेको दरमा शेयर खरिद गर्नेको आकर्षणले आज बरुणको शेयर मूल्यमा सर्किट लागेको ।
चन्द्रागिरी हिल्सको शेयर मूल्यमा पनि ६.०६ प्रतिशतले सुधार भएको छ । अन्य कम्पनीहरु अपि पावर, तारागाँउ रिजेन्सी, ओरियण्टल होटल, सिङ्गटी हाइड्रो, सोल्टी होटल, नेपाल हाइड्रो र एक्सेल डेभलपमेन्ट बैंकको शेयर मूल्यमा सर्वाधिक सुधार देखिएको छ ।
प्रधानमन्त्री तथा अर्थमन्त्री शेयर बहादुर देउवाले नेपाल राष्ट्र बैंकका गभर्नरलाई बर्खास्त गरेर निलम ढुङ्गानालाई कार्यबहाकको जिम्मेवारी दिने हल्लाले आज शेयर बजारमा दोहोरो अंकको सुधार देखिएको छ । आज मन्त्रिपरिषदको बैठक बस्दैछ । यहि बैठकमा प्रधानमन्त्री देउवाले निलम ढुङ्गानालाई कार्यबहाक बनाउने चर्चा बाहिरिएको छ ।
शेयर बजार विरोधी गभर्नरको उपमा पाएका महाप्रसाद अधिकारीलाई हटाउने, बर्खास्त गर्ने जस्ता चर्चाले पनि विगतका दिनमा शेयर बजार प्रभावित हुने गरेको थियो । सोमबार नेप्से सूचक १८.०३ अंकले बढेर २०२९.४३ अंक कायम भएको छ ।
