काठमाडौं । शेयर बजार सर्वाधिक तल्लो विन्दुबाट उकालो लाग्न थाले सँगै लगानीकर्ताको ध्यान राम्रा राम्रा कम्पनीमा पर्न थालेको छ । अहिलेको अवस्थामा आकर्षक र राम्रो लाभांश दिने कम्पनीको शेयर मूल्य पनि सबैभन्दा तल्लो विन्दुमा छ । यहि समयमा ति कम्पनीको शेयर खरिद गर्दा आकर्षक लाभांश पाउने भएकाले पनि उक्त कम्पनीमा आकर्षण देखिएको हो ।
आज लगानीकर्ताको सर्वाधिक धेरै रोजाइमा एनआईसी एशिया परेको छ । एनआईसी एशिया बैंकको मात्रै आज ३० करोड १८ लाख रुपैयाँको कारोबार भएको छ । सर्वाधिक प्रतिशेयर आम्दानी बनाउन सफल एनआईसी एशियाले यस वर्ष आकर्षक लाभांश दिने पुर्वानुमान गरिएको छ ।
हकप्रदको हल्ला सँगै दोस्रो धेरै रोजाइमा अपर तामाकोशी परेको छ । अपर तामाकोशीको मात्रै १४ करोड १३ लाख रुपैयाँको कारोबार भएको छ । तेस्रो धेरै कारोबार हुनेमा एशियन लाइफ छ । एशियन लाइफको ८ करोड ४६ लाख रुपैयाँको किनबेच भएको छ । हरेक वर्ष आकर्षक नगद लाभांश दिने शिवम् सिमेन्टको ८ करोड ३९ लाख रुपैयाँको कारोबार भएको छ ।
हिमालयन डिष्ट्रलरीको ६ करोड ६४ लाख रुपैयाँको कारोबार भएको छ । स्ट्याण्डर्ड चार्टर्ड बैंकको ६ करोड २० लाख, एसबिआई बैंकको ६ करोड १४ लाख, गरिमा विकास बिकास बैंकको ५ करोड ७७ लाख, अरुण काबेली ५ करोड ३३ लाख र नेपाल टेलिकमको ४ करोड ८७ लाख रुपैयाँको कारोबार भएको छ ।
