काठमाडौं । सिद्धार्थ इन्स्योरेन्स कम्पनी र प्रिमियर इन्स्योरेन्स कम्पनीले एक आपसमा मर्जरमा जाने सहमति गरेका छन् । असार २७ गते अपरान्ह ४ बजे दुबै कम्पनीको सञ्चालक समितिले मर्जरमा जाने निर्णय गरेका हुन् ।
हाल प्रिमियर इन्स्योरेन्सको चुक्ता पुँजी १ अर्ब २२ करोड रहेको छ भने सिद्धार्थ इन्स्योरेन्सको चुक्ता पुँजी १ अर्ब २८ करोड रहेको छ । यदी समान हैसियतमा मर्जरमा गएको अवस्थामा नयाँ बन्ने कम्पनीको चुक्ता पुँजी २ अर्ब ५१ करोड हुने छ । बीमा समितिले निर्जीवन बीमा कम्पनीलाई चैत्र मसान्तसम्म २ अर्ब ५० करोड पुँजीको लक्ष्य दिएको छ ।
दुवै कम्पनीले आर्थिक वर्ष ७८/७९ को तेश्रो त्रैमासको वित्तीय विवरणको आधारमा गरिएको तुलनात्मक अध्ययन :
जगेडा कोषको आधारमा :
प्रिमियर इन्स्योरेन्सको जगेडा कोषमा ३५ करोड ७७ लाख रुपैयाँ रहेको छ भने सिद्धार्थ इन्स्योरेन्सको जगेडा कोषमा २५ करोड ३९ लाख रहेको छ । समान हैसियतमा मर्जरमा गएमा दुई कम्पनीको जगेडामा ६१ करोड १७ लाख रुपैयाँ हुने छ ।
बीमा कोषको आधारमा :
प्रिमियर इन्स्योरेन्सको बीमा कोषमा ९६ करोड ६० लाख रुपैयाँ रहेको छ भने सिद्धार्थ इन्स्योरेन्सको बीमा कोषमा १ अर्ब ९ करोड रहेको छ । मर्जर पश्चात दुई कम्पनीको बीमा कोषमा २ अर्ब ६ करोड रुपैयाँ हुने छ ।
कुल बीमा शुल्क :
प्रिमियर इन्स्योरेन्सले चालु आर्थिक वर्षको चैत्र मसान्तसम्म १ अर्ब ६४ करोड कुल बीमा शुल्क आर्जन गरेको छ भने सिद्धार्थ इन्स्योरेन्सले २ अर्ब माथि कुल बीमा शुल्क आर्जन गरेको छ । दुई कम्पनीको बीमा शुल्क जोडेर हेर्दा ३ अर्ब ६४ करोड हुनेछ।
खुद नाफाको आधारमा :
प्रिमियर इन्स्योरेन्सले चालु आर्थिक वर्ष ७८/७९ को तेश्रो त्रैमाससम्म २५ करोड ४२ लाख रुपैयाँ खुद नाफा आर्जन गरेको छ भने सिद्धार्थ इन्स्योरेन्सले १७ करोड ३४ लाख रुपैयाँ खुद मुनाफा आर्जन गरेको छ ।
वार्षिक प्रति शेयर आम्दानी :
प्रिमियर इन्स्योरेन्सको वार्षिक प्रति शेयर आम्दानी २७ रुपैयाँ ६१ पैसा छ भने सिद्धार्थ इन्स्योरेन्सको वार्षिक प्रति शेयर आम्दानी १७ रुपैयाँ ९६ पैसा छ । मर्जर पश्चात दुई कम्पनीको वार्षिक प्रति शेयर आम्दानी २२ रुपैयाँ ६७ पैसा हुन्छ ।
किताबी मूल्यको आधारमा :
प्रिमियर इन्स्योरेन्सको किताबी मूल्य २१२ रुपैयाँ ३५ पैसा छ भने सिद्धार्थ इन्स्योरेन्सको किताबी मूल्य २११ रुपैयाँ ३२ पैसा छ । मर्जर पश्चात दुई कम्पनीको किताबी मूल्य २११ रुपैयाँ ८२ पैसा हुने छ ।
बजार मूल्य :
मर्जर सम्झौता भएर शेयर कारोवार रोकिनु अघि प्रिमियर इन्स्योरेन्सको बजार मूल्य ५७६ रुपैयाँ थियो भने सिद्धार्थ इन्स्योरेन्सको बजार मूल्य ५४३ रूपैयाँ ७० पैसा थियो ।
