काठमाडौं । समयमै लेखापरिक्षण प्रतिवेदन पेश नगरेकोमा मेट लाईफ इन्स्योरेन्स बाहेक सबै जीवन बीमा कम्पनीहरु बीमा समितिको कारवाहीमा परेका छन् ।
बीमा समितिले आर्थिक वर्ष २०७७।७८ को लेखा परिक्षण प्रतिवेदन पेश नगरेको भन्दै १८ वटा जीवन बीमा कम्पनीलाई १० हजार रुपैयाँँ देखि १० हजार ५ सय रुपैयाँका दरले जरिवाना गरेको हो । यसबाहेक ३ वटा निर्जीवन बीमा कम्पनी र सरकारी स्वामित्वको पूनर्बीमा कम्पनी नेपाल पूनर्बीमा कम्पनी समेत नगद जरिवानामा परेको छ ।
बीमा समितिका अनुसार एलआईसी नेपाल, एशियन लाइफ इन्स्योरेन्स, सूर्य लाइफ, प्राइम लाइफ, ज्योति लाइफ, रिलायन्स लाइफ, सिटिजन्स लाइफ, प्रभु लाइफ र महालक्ष्मी लाइफ इन्स्योरेन्स १० हजार रुपैयाँ जरिवानामा परेका छन् । समितिले सरकारी स्वामित्वको नेपाल पूनर्बीमा कम्पनी समेत १० हजार रुपैयाँ जरिवाना गरेको छ ।
यस्तै नेशनल लाइफ, नेपाल लाइफ, राष्ट्रिय बीमा संस्थान, गुराँस लाइफ, आइएमई लाइफ, युनियन लाइफ, सन नेपाल लाइफ, रिलायबल नेपाल लाइफ, सानिमा लाइफलाई १० हजार ५ सय रुपैयाँको दरले जरिवाना गरेको छ । निर्जीवन बीमकमध्ये दि ओरियन्टल इन्स्योरेन्स, नेशनल इन्स्योरेन्स र सरकारी स्वामित्वको राष्ट्रिय बीमा कम्पनीलाई १० हजार ५ सय रुपैयाँको दरले जरिवाना गरेको छ ।
यी कम्पनीहरुलाई यसअघि पनि बीमा समितिले २०७६।७७ को वित्तीय विवरण समयमै पेश नगरेको भन्दै जरिवाना गरेको थियो ।
बीमा ऐन, २०४९ को दफा २५ बमोजिम बीमा कम्पनीले प्रत्येक आर्थिक वर्ष समाप्त भएको मितिले १० महिनाभित्र लेखापरीक्षण प्रतिवेदन समितिमा बुझाउनुपर्ने कानुनी व्यवस्था छ । सो व्यवस्था बमोजिम आर्थिक वर्ष २०७७।७८ को लेखापरीक्षण प्रतिवेदन नबुझाउने बीमा कम्पनी प्रत्येकलाई १० हजार रुपैयाँका दरले नगद जरिवाना गरेको हो । त्यसैगरी समितिले यसअघि २०७६।७७ को वित्तीय विवरण समयमै पेश नगरी कारवाहीमा परिसकेका र आर्थिक वर्ष २०७७।७८ को लेखापरीक्षण प्रतिवेदन समेत नबुझाई दोस्रो पटक कारवाहीमा परेका बीमकलाई थप ५ सय सहित जम्मा १० हजार ५ सय रुपैयाँका दरले जरिवाना गरेको हो ।
