काठमाडौं । शेयर लगातार तल झर्ने क्रममा यस भन्दा अघिल्लो बुलको अधिकतम विन्दु भन्दा तल झरेको छ । नेप्से सूचक अघिल्लो बुलको समयमा २०७३ साउन १२ गते १८८१.४५ अंक पुगेर तल झरेको थियो । यस विन्दुबाट तल झर्ने क्रममा शेयर बजार ११०० अंकसम्म झर्यो ।
यहि विन्दुबाट उकालो लागेको शेयर बजार गत भदौ २ गते अधिकतम ३१९९ अंकसम्म पुग्यो । करिव १० महिनाको अवधिमा शेयर बजार लगातार तल झर्ने क्रममा अघिल्लो बुलको अधिकतम विन्दु भन्दा पनि तल झरेको छ । नेपालको इतिहासमा छोटो समयमा यति धेरै तल झरेको पहिलो रेकर्ड हो ।
सोमबार शेयर बजार सर्वाधिक तल झर्ने क्रममा १८७९.८८ अंकसम्म तल झर्यो । कारोबार सुरुभएदेखिनै लगातार घट्न थालेको थियो । आज कारोबारको अतिमसम्ममा ४९.३१ अंकको गिरावट भएको छ । नेप्से सूचक २.५५ प्रतिशतले घटेर १८८४.८१ अंक कायम भएको छ ।
बजारमा तिव्र गिरावट आए पनि कारोबार रकम भने केहि सुधार भएको छ । आज एक अर्ब ७५ करोड रुपैयाँको कारोबार भएको छ । सोमबार २३० कम्पनीको शेयर खरिद बिक्री हुँदा जम्मा ४ वटा कम्पनीको मात्रै सुधार भएको छ । जसमा आधिखोला लघुवित्त, सिवाइसी नेपाल लघुवित्त, ओरियण्टल होटल र गुराँस फाइनान्सको भने बढेको छ ।
आज शेयर बजारमा अधिकतम गिरावट देखिए पनि कारोबार रकम भने बढेको छ । कारोबार रकम बढ्नुले पनि शेयर बजारमा सुधार हुने संकेत देखिएको छ । प्राय बियरिस मार्केटको तल्लो बिन्दु अघिल्लो बुलको अधिकतम विन्दु हाराहारी हुने गर्छ । तर यस पटकको बुल नसोचिएको हिसावले र छिटो बढेको हुँदा १८ सयको विन्दु भन्दा केहि तल झरेर अवको बुलको आधार बनाउन सक्ने विश्लेषकहरु बताउछन् ।
