काठमाडौं । नेपाल इन्स्योरेन्स कम्पनीले वीरकृष्ण महर्जनलाई प्रमुख कार्यकारी अधिकृतमा नियुक्त गरेको छ । कम्पनीको जेठ १७ गते बसेको सञ्चालक समितिको बैठकले आज बुधबारदेखि कायम हुने गरी आगामी चार वर्षका लागि नियुक्ति गर्ने निर्णय गरेको हो ।
महर्जन प्रुडेन्सियल इन्स्योरेन्स कम्पनीको सिइओ पदबाट राजिनामा दिएको दुई दिनमै कुलिङ पिरियड छल्न गत कार्तिक ७ गते नायब प्रमुख कार्यकारी अधिकृतमा नियुक्त भएका थिए ।
नेपाल इन्स्योरेन्स कम्पनीले ११ महिना पछि प्रमुख कार्यकारी अधिकृत पाएको छ । निवर्तमान प्रमुख कार्यकारी अधिकृत विजय बहादुर शाहको चार वर्षे कार्यकाल गत साउन ९ गते सकिएको थियो । साउन ९ गतेदेखि कम्पनी प्रमुख कार्यकारी अधिकृत विहिन थियो ।
कम्पनीले महर्जनलाई नै प्रमुख कार्यकारी अधिकृतमा भित्र्याउन चाहन्थ्यो तर बीमा कम्पनीको संस्थागत सुशासन निर्देशिका अनुसार ६ महिनाको कुलिङ पिरियड लाग्ने भए पनि एक तह घटेरै कम्पनी छिरेका थिए ।
93db4035a7951abcb3bacfd138f03c8c
