काठमाडौं । नेपाल धितोपत्र बोर्डका अध्यक्ष रमेश कुमार हमालले शेयर बजार आगामी जेठ एक गतेदेखि पनि साताकै पाँचै दिन सञ्चालन हुने बताएका छन् । हमालले नेपाल उद्योग बाणिज्य महासंघले आयोजना गरेको पूँजी बजार सम्बन्धी छलफल कार्यक्रममा सरकारले इन्धन खपत घटाउन जेठदेखी परीक्षण स्वरुप शनिवार र आइतबार दुई दिन विदा दिने निर्णय गरे पनि शेयर बजार ५ दिन नै सञ्चालन हुने अभिव्यक्ति दिएका हुन् ।
सरकारले आइतबार विदा दिने निर्णय गरेकाले अवदेखि शेयर बजार शक्रवार पनि सञ्चालन गरेर दिन नघटाउने बताएका हुन् । उनले शुक्रवार पनि शेयर बजार सुचारु राख्न नेप्सेलाई निर्देशन दिइसकेको जानकारी दिएका छन् । हाल शेयर बजार शनिवार र आइतबार दुई दिन बन्द हुँदै आइरहेको छ ।
सरकारले शनिवार र आइतबार दुई दिन बिदा दिने निर्णय गरे सँगै अव शेयर बजार चार दिन मात्रै खुला रहने चर्चा चल्दै आइरहेको थियो । तर बोर्ड शेयर बजार खुल्ने अवधिलाई नघटाउने पक्षमा उभिएको थियो ।
